ბაკურიანში წელს 10 მლნ დოლარზე მეტის ღირებულების ბინები გაიყიდა - როგორია კვადრატულის ფასი?
2024 წლის 1-ელ კვარტალში ბაკურიანში 220 ბინა გაიყიდა, რაც წლიურად მცირედი - 6.0%-იანი კლებაა. ამის შესახებ „გალთ ენდ თაგარტის“ კვლევაშია აღნიშნული.
მათივე ცნობით, ტრანზაქციების უმეტესობა - 65.5% მეორად ბაზარზე დაფიქსირდა.
„ბაკურიანში ამჟამად 14 საცხოვრებელი პროექტის გაყიდვები მიმდინარეობს პირველად ბაზარზე. 2024 წლის 1-ელ კვარტალში ბაკურიანისთვის დამახასიათებელი ტენდენციის შესაბამისად, მცირე ზომის ბინებმა (26-50 კვ.მ. ) მთლიანი გაყიდვების 76.7% შეადგინა. ამასთან, გაყიდული ბინების 55.7% ბიუჯეტური ფასის სეგმენტიდან (<$1000), ხოლო 42% საშუალო ფასის სეგმენტიდან იყო ($1001 – 1500),“- ნათქვამია კვლევაში.
როგორც დოკუმენტშია აღნიშნული, 2024 წლის 1-ელ კვარტალში ბაკურიანში ბინების საშუალო შეწონილი ფასი წლიურად 2.7%-ით გაიზარდა და კვადრატულ მეტრზე 1044 დოლარს გაუტოლდა.
კვლევის თანახმად, ბაკურიანში გაყიდული ბინების ჯამურმა ღირებულებამ 10.4 მლნ აშშ დოლარი შეადგინა, რაც წლიურად 1.9%- იანი კლებაა და პირველად ბაზარზე შემცირებულ ტრანზაქციებს მიეწერება.
