რაზე უჩივიან ბანკებს - მომხმარებლების პრეტენზიები 73%-ით გაიზარდა
2024 წლის აპრილში, წინა წლის ანალოგიურ პერიოდთან შედარებით, კომერციული ბანკების მიმართ პრეტენზიები 73%-ით გაიზარდა.
კერძოდ, ეროვნული ბანკის მონაცემებით, წელს აპრილი მათ მიმართ მომხმარებლების მხრიდან 2 454 საჩივარი დაიწერა, 2022 წლის იგივე პერიოდში - 1 420.
ამასთან, სებ-ის სტატისტიკის მიხედვით, 2024 წლის აპრილში დაფიქსირებული პრეტენზიებიდან, ყველაზე მეტი მიმდინარე ანგარიშებზე, სამომხმარებლო სესხებსა და ინტერნეტბანკზე დაფიქსირდა.
უფრო კონკრეტულად, პროდუქტების მიხედვით საჩივრების ხუთეული (2024 წლის აპრილში) ასე გამოიყურება:
- მიმდინარე ანგარიში/სადებეტო ბარათი - 1340 განაცხადი;
- სამომხმარებლო სესხი - 430 განაცხადი;
- საკრედიტო ბარათი - 119განაცხადი;
- ინტერნეტბანკი – 82 განაცხადი;
- ბიზნეს სესხი - 40 განაცხადი.
პრეტენზიების შინაარსის მიხედვით, საანგარიშო პერიოდში შესული საჩივრებიდან ყველაზე მეტი განაცხადი - 1205 ტრანზაქციებზე მოდის, შემდეგია ადმინისტრაცია/მომსახურება - 459 საჩივრით, მე-3 ადგილზეა ხელშეკრულების პირობებთან დაკავშირებულ პრეტენზიები - 364 განაცხადით.
ეროვნული ბანკის ვებ-გვერდზე გამოქვეყნებული სტატისტიკის მიხედვით, 2024 წლის აპრილში 2 454 საჩივრიდან ბანკებმა 1 178 განაცხადი - უსაფუძვლოდ, 468 - საფუძვლიანად მიიჩნიეს; 800 განაცხადის შემთხვევაში განხილვა ისევ მიმდინარეობს. 8-ის შემთხვევაში განხილვა დასრულებულია, პრეტენზია მიჩნეულია საფუძვლიანად, თუმცა პრობლემა არ არის აღმოფხვრილი.
აღსანიშნავია, რომ მომხმარებელთა ცხელი ხაზი ეროვნულ ბანკში 2011 წლიდან მოქმედებს. პრეტენზიების სტატისტიკაც ამის შემდეგ იწარმოება.
