ვის ჩამოეწერება მიწისქვეშა მტკნარი წყლების ჩამოსხმისთვის დაკისრებული გადაუხდელი ჯარიმები
მთავრობამ მიწისქვეშა მტკნარი წყლების ჩამოსხმისთვის გათვალისწინებული გადაუხდელი მოსაკრებლის, ჯარიმისა და საურავის ჩამოწერის წესი დაამტკიცა.
დადგენილების მიხედვით, მიწისქვეშა მტკნარი წყლების ჩამოსხმისთვის გათვალისწინებული გადაუხდელი მოსაკრებელი და მასთან დაკავშირებული გადაუხდელი ჯარიმა და საურავი შესაძლებელია, რომ პირის განცხადების საფუძველზე ჩამოიწეროს.
ამავდროულად, მოსაკრებელი, ჯარიმა და საურავები შესაძლოა, ჩამოიწეროს შემდეგ შემთხვევაში: თუ პირს 2023 წლის 1-ელ დეკემბრამდე შესაბამისი ლიცენზიით (სათანადო დამტკიცებული ათვისების გეგმით ან მის გარეშე) არ უსარგებლია და მიწისქვეშა მტკნარი წყალი არ ჩამოუსხამს. ამასთან, კმაყოფილდება ერთ-ერთი შემდეგი პირობა:
- პირი, 2023 წლის 1-ელი დეკემბრის მდგომარეობით, აღარ ფლობს მიწისქვეშა მტკნარი წყლების ჩამოსხმისთვის გაცემულ ლიცენზიას;
- პირი 2024 წლის 1-ელ აპრილამდე მიწისქვეშა მტკნარი წყლების ჩამოსხმისთვის ლიცენზიის გამცემ ორგანოს მიმართავს ამ ლიცენზიის გაუქმების შესახებ და 2023 წლის 1 დეკემბრიდან 2024 წლის 1 აპრილის ჩათვლით არ უსარგებლია აღნიშნული ლიცენზიით, კერძოდ, არ ჩამოუსხამს მიწისქვეშა მტკნარი წყალი.
