ევროპის საბჭომ საქართველოს შესახებ რეზოლუცია მიიღო

ასამბლეა შეშფოთებულია, რომ „უცხოური გავლენის გამჭვირვალობის შესახებ კანონის“ საკამათო მიღება არ არის იზოლირებული მოვლენა, არამედ მთელი რიგი მოვლენების კულმინაციას წარმოადგენს, რომლებიც აშკარად მიუთითებს ქვეყნის დემოკრატიულ უკუსვლაზე, - ამის შესახებ ევროპის საბჭოს საპარლამენტო ასამბლეის რეზოლუციაშია აღნიშნული, რომელიც დღეს მიიღეს.

„ეს ტენდენცია უნდა შეიცვალოს. ასამბლეა მოუწოდებს საქართველოს ხელისუფლებას, მკაფიოდ აღასრულოს საკუთარი ვალდებულება ქვეყნის დემოკრატიული კონსოლიდაციისა და შემდგომი ევროინტეგრაციის მიმართ და შეასრულოს საქართველოს მიერ ნაკისრი ვალდებულებები და ევროსაბჭოში გაწევრიანების ვალდებულებები, არა მხოლოდ სიტყვებით, არამედ კონკრეტული და ხელშესახები ქმედებებით“, - აღნიშნულია რეზოლუციაში.

ასამბლეა ხაზს უსვამს, რომ „უცხოური გავლენის გამჭვირვალობის შესახებ“ კანონის მიღება არ შეიძლება განიხილებოდეს საქართველოს მოახლოებული საპარლამენტო არჩევნებისგან იზოლირებულად.

„ასამბლეა შიშობს, რომ ეს კანონი უარყოფითად იმოქმედებს ამ არჩევნების ჩატარებაზე და მისი შედეგის მიმართ დაინტერესებული მხარეების და საზოგადოების ნდობაზე, რამაც, შეიძლება, გავლენა მოახდინოს არჩევნების ლეგიტიმურობაზე. ეს განსაკუთრებით აქტუალურია, რადგან ამ კანონის მიღებამ, მიუხედავად მის წინააღმდეგ ფართოდ გავრცელებული წინააღმდეგობისა ქართულ საზოგადოებაში, მოახლოებული არჩევნები გარდაუვლად გადააქცია დე ფაქტო რეფერენდუმად საქართველოს დემოკრატიული ტრაექტორიისა და საგარეო კავშირის შესახებ, საგრძნობლად გაზარდა ფსონები ამ არჩევნებში და ზრდის პოლარიზაციას და დაძაბულობას წინასაარჩევნო კლიმატში“, - აღნიშნულია რეზოლუციაში.

ამასთან, ასამბლეა შეშფოთებულია, რომ არსებობს რეალური შესაძლებლობა, რომ „უცხოური გავლენის გამჭვირვალობის შესახებ“ კანონის მიღების შედეგად, სამოქალაქო საზოგადოების ორგანიზაციებმა, რომლებსაც აქვთ არჩევნებზე დაკვირვების ხანგრძლივი და დიდი გამოცდილება, ვეღარ შეძლონ არჩევნებზე დაკვირვება.

„მათი, როგორც არჩევნების დამკვირვებლების გამორიცხვა, ასამბლეისთვის სრულიად მიუღებელი და, რა თქმა უნდა, კონტრპროდუქტიული იქნება“, - აღნიშნულია რეზოლუციაში.