13 ივნისის სტიქიით დაზარალებულებს, შესაძლოა, საბანკო სესხები აღარ გადაახდევინონ

სტიქიის შედეგად დაზარალებული პირებისთვის საბანკო სესხების შესაძლო პატიების საკითხი განიხილება. დაზარალებულებისათვის საბანკო ვალდებულებების კუთხით შეღავათების გაწევის თაობაზე საბანკო სექტორთან გუშინ გამართული შეხვედრის შემდეგ განმარტებები ჟურნალისტებისთვის თბილისის ვიცე-მერმა დიმიტრი ქუმსიშვილმა გააკეთა.

"კომერციულ ბანკებთან შეხვედრისას რამდენიმე პრინციპული საკითხი განვიხილეთ. ბანკებს აქვთ სურვილი, განიხილონ გარკვეული შეღავათები, მათ შორის შესაძლოა, დაზარალებულ პირთათვის სესხების პატიება სამომხმარებლო ნაწილში, თუმცა ეს მათი გადაწყვეტილება იქნება და ამ გადაწყვეტილებაზე უახლოეს მომავალში თავად იტყვიან", - განუცხადა ჟურნალისტებს დიმიტრი ქუმსიშვილმა.

მისივე ცნობით, შეხვედრაზე განხილვის საკითხი იყო იმ ფონდების განკარგვის საკითხი, რომელიც ბანკებში აკუმულირდება. "ჩვენთვის მნიშვნელოვანია შემუშავდეს გამჭვირვალობის წესი, როდესაც ყველა შემომწირველს ეცოდინება, რომ თითოეული თეთრი მიზნობრივად დაიხარჯა ან დაზარალებული პირების საჭიროებებზე, ან ქალაქის ინფრასტრუქტურის აღდგენაზე", - განაცხადა დიმიტრი ქუმსიშვილმა.

დიმიტრი ქუმსიშვილი და მასთან ერთად ბიზნესომბუდსმენი გიორგი გახარია საბანკო სექტორის წარმომადგენლებს გუშინ მთავრობის კანცელარიაში შეხვდნენ.