რა გაკეთდა აჭარის ტურისტული პოპულარიზაციისთვის
2020-2023 წლებში მთიანი აჭარის ტურისტული პოპულარიზაციისთვის ჩატარდა ორი პრეს-ტური, - ამის შესახებ ტურიზმის ეროვნული ადმინისტრაციის მიერ „ბიზნესპრესნიუსის“ კითხვის საპასუხოდ გამოგზავნილი ინფორმაციიდან ირკვევა.
ამავე პერიოდში აჭარის რეგიონში ღვინის მასპინძელი 3 ობიექტი ჩართეს პროექტ „ღვინის გზაში“ და მათ საგზაო მანიშნებლები დაუმონტაჟეს. პროექტი სახელმწიფო ბიუჯეტიდან დაფინანსდა. ეს ობიექტებია:
- 2020 წელი - ქედის მუნიციპალიტეტი: „შატო ივერი“.
- 2022 წელი - შუახევის მუნიციპალიტეტი: „კეჟერაძეების მარანი“.
- 2023 წელი - ქობულეთის მუნიციპალიტეტი: ცერცვაძეების მარანი“.
ტურიზმის ეროვნული ადმინისტრაციის ცნობით, მთლიანი აჭარის ტურისტული პოპულარიზაციისთვის „2020 წელს მოინიშნა გურიისა და მთიანი აჭარის 3 საფეხმავლო ბილიკი“.
„ბიზნესპრესნიუსმა“ ტურიზმის ეროვნული ადმინისტრაციიდან გამოითხოვა ინფორმაცია, რა დაჯდა აღნიშნული პროექტები, თუმცა უწყებამ მხოლოდ ჩატარებული ღონისძიებების ჩამონათვალი მოგვაწოდა. პროექტებზე დახარჯული თანხის მოწოდების შემთხვევაში, ინფორმაციას შემოგთავაზებთ.
