საუდის არაბეთის კეთილდღეობის ფონდი მოგებაზე გადავიდა
საუდის არაბეთის კეთილდღეობის სუვერენულმა ფონდმა 2023 წელი მოგებით დაასრულა, მაშინ, როცა 2022 წელს 11 მლრდ დოლარის ზარალი განიცადა. ინფორმაციას Bloomberg ავრცელებს.
კერძოდ, სახელმწიფო ფონდმა გასულ წელს საინვესტიციო საქმიანობიდან 25 მლრდ დოლარი გამოიმუშავა. ფონდის მუშაობა დივიდენდის შემოსავლით და გარეშე, უცხო ფონდების უკეთესი მაჩვენებლების შედეგად გაუმჯობესდა.
მთლიანი სესხები 2022 წლის 85 მლრდ დოლარიდან გასულ წელს 125 მლრდ დოლარამდე გაიზარდა. ეს გლობალური ბაზრების ზრდამ და ფონდის, როგორც ახლო აღმოსავლეთში ერთ-ერთი უმსხვილესი სამთავრობო ინვესტორის პოზიციის განმტკიცებამ განაპირობა.
სუვერენული ფონდი 925 მლრდ დოლარის აქტივებს აკონტროლებს, რითიც ოდნავ ჩამორჩება აბუ დაბის საინვესტიციო ფონდს, რომელიც რეგიონში ყველაზე დიდი სუვერენული ფონდია.
ვრცელდებოდა ინფორმაციები, რომ ფონდმა ტექნოლოგიური კომპანიების აქციების ზრდით ისარგებლა და მიმდინარე წლის პირველ კვარტალში აშშ-ის აქციებში, კერძოდ, Amazon.com Inc.-ში, Microsoft Corp.-სა და Salesforce Inc-ში თავისი წილი სათითაოდ 600 მლნ დოლარზე მეტად შეამცირა.
ფონდის ფულადი რეზერვები 65 მლრდ დოლარამდე გაიზარდა, მაშინ, როცა 2023 წლის სექტემბრისთვის 15 მლრდ დოლარს, ანუ 2020 წლის შემდეგ ყველაზე დაბალ ოდენობას შეადგენდა.
ფონდის ამბიციების მასშტაბი მოიცავს 40 მლრდ დოლარის ოდენობის ხელოვნური ინტელექტის ფონდს, 100 მლრდ დოლარის ღირებულების ელექტროსაქონლის საწარმოო მექანიზმსა და საუდის არაბეთში უზარმაზარ ახალ განვითარებებს, რომელიც, სავარაუდოდ, ტრილიონობით დოლარი დაჯდება. ეს ზეწოლას ახდენს როგორც თავად ფონდზე, ასევე, სამეფოზე.
ამჟამად ფონდი Saudi Aramco-ს 16%-იან წილს ფლობს, რაც ნავთობგიგანტის სტაბილური წლიური დივიდენდებიდან მიღებული 125 მლრდ დოლარის შემოსავლის ნაწილზე მის წვდომას უზრუნველყოფს.
მოამზადა ლადო სულაბერიძემ