დადგინდეს მთავრობის წევრების ლობისტებთან ურთიერთობის წესი - GRECO
ევროპის საბჭომ „კორუფციის წინააღმდეგ მებრძოლ სახელმწიფოთა ჯგუფმა“ საქართველოში კორუფქციის პრევენციისა და კეთილსინდისირების შესახებ შეფასების მე-5 რაუნდის ანგარიში გამოაქვეყნა.
ანგარიშში აღნიშნულია, რომ 2020 წლის შემდეგ საქართველოში არ შემუშავებულა ახალი ეროვნული ანტიკორუფციული სტრატეგია და სამოქმედო გეგმა. აქედან გამომდინარე, GRECO მოუწოდებს საქართველოს მიიღოს კონკრეტული სტრატეგია აღმასრულებელ ხელისუფლებაში კორუფციის თავიდან აცილების მიზნით.
ამასთანავე, GRECO-ს ანგარიშში აღნიშნულია, რომ საქართველოში ლობისტური რეგულაციები არსებობს, მაგრამ პრაქტიკაში არ არის აღსრულებული. ლობიზმის კუთხით გადასადგემილი სარეკომენდაციო ღონისძიებები ასე გამოყურება:
- დადგინდეს წესები, თუ როგორ ურთიერთობენ უმაღლესი აღმასრულებელი ფუნქციების მქონე პირები ლობისტებთან და სხვა მესამე მხარეებთან, რომლებიც ცდილობენ გავლენა მოახდინონ მთავრობის სამართალშემოქმედებით და სხვა საქმიანობაზე;
- გამჟღავნდეს საკმარისი ინფორმაცია ამ კონტაქტების მიზნის შესახებ, როგორიცაა იმ პირ(ებ)ის ვინაობა, ვისთანაც (ან ვისი სახელით) გაიმართა შეხვედრა(ებ)ი, ასევე კონკრეტული განსახილველი საკითხ(ებ)ი.
ცნობისთვის, GRECO საქართველოსთვის გაცემული რეკომენდაციების შესრულებას 2025 წელს შეაფასებს.
იხილეთ ასევე: ქონების დეკლარირების ვალდებულება გავრცელდეს აღმასრულებელი ფუნქციების მქონე ყველა პირზე - GRECO
