Sotheby-ის აუქციონზე დინოზავრის ჩონჩხი რეკორდულ თანხად - 44,6 მილიონ დოლარად, გაიყიდა
Sotheby-ის აუქციონზე დინოზავრის ჩონჩხი რეკორდულ თანხად 44,6 მილიონ დოლარად გაიყიდა, თუმცა თავდაპირველად ის მაქსიმუმ 6 მილიონ დოლარად იყო შეფასებული. ამის შესახებ Newsweek წერს.
გამოცემის თანახმად, ანონიმური მყიდველი ამერიკელია და, როგორც აუქციონის სახლი იტყობინება, მან ექვსი პრეტენდენტი დაამარცხა. გაყიდვის შემდეგ მყიდველმა, Sotheby's-ის ცნობით, თქვა: „Apex დაიბადა ამერიკაში და აპირებს ამერიკაში დარჩენას!“
წინა რეკორდი ყველაზე მაღალი ღირებულებით 2020 წელს დაამყარა ტირანოზავრმა სახელად „სტანმა“. ის 31,8 მილიონ დოლარად გაიყიდა.
დინოზავრის ჩონჩხი აღმოაჩინა კომერციულმა პალეონტოლოგმა ჯეისონ კუპერმა, კოლორადოში 2022 წელს. ეს არის სტეგოზავრის ერთ-ერთი ყველაზე სრულყოფილი ნიმუში, რომელიც ოდესმე აღმოჩენილა. მისი სიმაღლეა 11 ფუტი და სიგრძე 27 ფუტი. Apex-ის შთამბეჭდავი ზომა და სისრულე მას აუქციონზე სასურველ ნივთად აქცევს.
აპექსის ჩონჩხს ართრიტის ნიშნები აქვს, რაც იმაზე მიუთითებს, რომ მას ხანგრძლივი სიცოცხლე ჰქონდა.
