რის გამო უჩივიან კომერციულ ბანკებს - მომხმარებლების პრეტენზიები თითქმის 58%-ით გაიზარდა
2024 წლის ივნისში, წინა წლის ანალოგიურ პერიოდთან შედარებით, კომერციული ბანკების მიმართ პრეტენზიები თითქმის 58%-ით გაიზარდა.
კერძოდ, ეროვნული ბანკის მონაცემებით, წელს ივნისში ბანკების მიმართ მომხმარებლებმა 2 529 საჩივარი დაწერეს, მაშინ როცა 2023 წლის იგივე პერიოდში ეს მაჩვენებელი - 1 604 იყო.
ამასთან, სებ-ის სტატისტიკის მიხედვით, 2024 წლის ივნისში დაფიქსირებული პრეტენზიებიდან, ყველაზე მეტი მიმდინარე ანგარიშებზე, სამომხმარებლო სესხებსა და საკრედიტო ბარათებთან დაკავშირებით დაფიქსირდა.
უფრო კონკრეტულად, პროდუქტების მიხედვით საჩივრების ხუთეული (2024 წლის ივნისში) ასე გამოიყურება:
- მიმდინარე ანგარიში/სადებეტო ბარათი - 1 521 განაცხადი;
- სამომხმარებლო სესხი - 342 განაცხადი;
- საკრედიტო ბარათი - 127 განაცხადი;
- ინტერნეტბანკი – 71 განაცხადი;
- იპოთეკური სესხი - 54 განაცხადი.
პრეტენზიების შინაარსის მიხედვით, საანგარიშო პერიოდში შესული საჩივრებიდან ყველაზე მეტი განაცხადი - 1 358 ტრანზაქციებზე მოდის, შემდეგია ადმინისტრაცია/მომსახურება - 481 საჩივრით, მე-3 ადგილზეა ხელშეკრულების პირობებთან დაკავშირებულ პრეტენზიები - 295 განაცხადით.
ეროვნული ბანკის ვებ-გვერდზე გამოქვეყნებული სტატისტიკის მიხედვით, 2024 წლის ივნისში 2 529 საჩივრიდან ბანკებმა 1 276 განაცხადი - უსაფუძვლოდ, 409 - საფუძვლიანად მიიჩნიეს; 835 განაცხადის შემთხვევაში განხილვა ისევ მიმდინარეობს. 9 განაცხადის შემთხვევაში განხილვა დასრულებულია, პრეტენზია მიჩნეულია საფუძვლიანად, თუმცა პრობლემა არ არის აღმოფხვრილი.
აღსანიშნავია, რომ მომხმარებელთა ცხელი ხაზი ეროვნულ ბანკში 2011 წლიდან მოქმედებს. პრეტენზიების სტატისტიკაც ამის შემდეგ იწარმოება.
