ქართული ხელოვნური ინტელექტის ცენტრი, დრონების ლაბორატორია, IT სკოლა - რა შენობები განთავსდება ქუთაისის პარლამენტის ტერიტორიაზე
საქართველოს მთავრობის გადაწყვეტილებით, ქუთაისში, პარლამენტის ყოფილ შენობაში ტექნოლოგიური ჰაბი გაიხსნება.
ეკონომიკისა და მდგრადი განვითარების მინისტრის მოადგილის, ირაკლი ნადარეიშვილის განცხადებით, ტექნოლოგიური ჰაბის გახსნა ძალიან მოკლე პერიოდში ქუთაისს აქცევს ერთ-ერთ მნიშვნელოვან მიზიდულობის ცენტრად რეგიონში მაღალი ტექნოლოგიებისა და ინოვაციების მიმართულებით.
ირაკლი ნადარეიშვილის თქმით, ქუთაისში აღნიშნული პროექტის განხორციელება წარმოადგენს იმ პოლიტიკის ნაწილს, რომელსაც საქართველოს მთავრობა ახორციელებს, მათ შორის, ინოვაციებისა და ტექნოლოგიების განვითარების მიმართულებით.
„ბოლო წლებში საქართველოს ყველა რეგიონში მოქმედებს ინოვაციებისა და ტექნოლოგიების სააგენტოს ტექნოპარკები, სადაც საქართველოს მოქალაქეებს აქვთ საშუალება, იმუშაონ ინოვაციური იდეების განხორციელებაზე, ჰქონდეთ წვდომა როგორც სახელმწიფო პროგრამებზე, ასევე გლობალურ ინოვაციურ ეკოსისტემაზე,“ - აღნიშნა ირაკლი ნადარეიშვილმა.
მინისტრის მოადგილის თქმით, ქუთაისში ტექნოლოგიური ჰაბის განვითარების მნიშვნელოვან ფაქტორებს წარმოადგენს სიახლოვე საერთაშორისო აეროპორტთან და ქუთაისის ტექნოლოგიურ უნივერსიტეტთან, რომელიც გამორჩეულია როგორც რეგიონის, ასევე გლობალური მასშტაბით. მინისტრის მოადგილემ ასევე ყურადღება გაამახვილა ქუთაისზე, როგორც ზუსტი და საბუნებისმეტყველო მეცნიერებების წარმატებული სკოლის მქონე ქალაქზე.
ეკონომიკისა და მდგრადი განვითარების სამინისტროს ცნობით, ტექნოლოგიური ჰაბის ტერიტორიაზე განთავსდება ინტერაქციული-სამეცნიერო-ტექნოლოგიური მუზეუმი, სტარტაპ აქსელერატორი, საერთაშორისო IT სკოლა, საკონფერენციო სივრცე, საერთო სამუშაო სივრცე, ქართული ხელოვნური ინტელექტის განვითარებისთვის მძლავრი მონაცემთა ცენტრი, ელექტრონიკის, რობოტიკის, დრონების, IoT, STEAM, სამრეწველო ინოვაციების (fablab) და სხვა ექსპერიმენტული ლაბორატორიები. ასევე, VR/AR Gaming ლაბორატორია, შეხვედრების და სატრენინგო ოთახები სტარტაპებისა და IT სპეციალისტებისთვის. კომპლექსში ასევე გამოიყოფა ფართი IT კომპანიებისთვის, რომლებიც ბოლო წლებია საქართველოში წარმატებით საქმიანობენ. შესაბამისად, ერთ-ერთი ყველაზე დიდი ტექნოლოგიური პარკი სწორედ ქუთაისის ტექნოლოგიურ ჰაბში განთავსდება.