ბათუმის ხელოვნური კუნძულზე გზშ-ს პროცედურა შეჩერებულია - რას ითხოვს სააგენტო „ამბასადორისგან“

ბათუმის ხელოვნური კუნძულზე გზშ-ს პროცედურა შეჩერებულია - ამის შესახებ გადაწყვეტილება გარემოს ეროვნულმა სააგენტომ უკვე მიიღო. სააგენტოს გადაწყვეტილება ეფუძნებოდა შპს „ტერმინალი 1“-ის წერილს და წარმოდგენილ დოკუმენტაციებს, რომელთა მიხედვითაც შპს „ტერმინალ 1“-ს უსაფრთხოებიდან გამომდინარე, დაუშვებლად მიიჩნევს კუნძულის მშენებლობა/მოწყობას წარმოდგენილი პროექტის ფარგლებში.

ცნობისათვის, „ტერმინალი1“ ბათუმის თევზის ბაზრის მიმდებარედ ნავთობტერმინალს ამუშავებს, „ამბასადორი ბათუმი აილენდი“ კი, ამ ტერმინალის მოპირდაპირე მხარეს ხელოვნურ ნახევარკუნძულს აშენებს.

გარემოს ეროვნული სააგენტოს ამ გადაწყვეტილების მიღებამდე „ტერმინალი 1“-მა სამთავრობო უწყებებს არაერთი განცხადებით მიმართა. კომპანიაში ამბობენ, რომ ხელოვნური კუნძულის მშენებლობა საფრთხეს უქმნის ნავიგაციას.

„ტერმინალ 1“-ს დაუშვებლად მიაჩნია განიხილებოდეს „ამბასადორი ბათუმი აილენდის“ პროექტი იმ პარამეტრებში, რომელიც დღეის მდგომარეობითაა წარმოდგენილი. აბსურდულია ნავთობტანკერის დგომის და გადატვირთვის ტერიტორიაზე, სადაც არის გაფრქვევის ადგილი, მომეტებული საფრთხის ზონა, სადაც ყველა მოქმედება გაწერილია ნავსადგურის წესებით/ინსტრუქციებით და რეგულირდება უსაფრთხოების და უშიშროების გეგმით, მოხდეს მრავალფუნქციური ტურისტული ზონის მოწყობა. შპს “ტერმინალი 1“ წარმოადგენს განსაკუთრებული დანიშნულების საწარმოო ობიექტს, ტერმინალის საოპერაციო საქმიანობასთან დაკავშირებული მომეტებული რისკებიდან და საფრთხეებიდან გამომდინარე, თითოეული ჩვენი ქმედება დარეგულირებულია ნავსადგურის წესებითა და ინსტრუქციებით“, - აცხადებს კომპანია.

ამასთან, „ტერმინალ 1“ წერს, რომ „ნავმისადგომის და ხომალდების შემოსვლის მარშრუტის მიმართულებით, გადაადგილდება მძიმე ტექნიკა, გადაადგილდებიან ადამიანები, უახლოვდებიან გადატვირთვის ადგილს, სადაც ტელეფონის უბრალოდ შეტანაც კი ფეთქებადსაშიშია, რომ აღარ ვისაუბროთ ღია ტერიტორიიდან საბოტაჟის შესაძლებლობაზე.“

„ტერმინალ1“ აცხადებს, რომ 2022 წელს გასცეს რეკომენდაცია ტერმინალის საზღვრებთან იმ უსაფრთხო მანძილთან დაკავშირებით, რომლის კუნძულის მიერ გადმოლახვის შემთხვევაში საფრთხე შეექმნებოდა ნავიგაციის უსაფრთხოებას. „ეს წერტილი დღეის მდგომარეობით გადმოლახვის საფრთხის ზონაშია“, - წერს კომპანია.

ამასთან, „ტერმინალ1“ სახელმწიფო უწყებებს წერს, რომ მათი შეშფოთება ეყრდნობა მრავალწლიან გამოცდილებას და საერთაშორისო საპროექტო კომპანია „ანკორ ინჟინერინგ“-ის შეფასებას.

კომპანიამ სამინისტროებს და სააგენტოს ასევე გადაუგზავნა „ანკორ ინჟინერინგ“-ის წინასწარი შეფასების ქართულად ნათარგმნი ვერსია. დოკუმენტაციაში აღნიშნულია, რომ „ამბასადორი ბათუმი აილენდის“ კომპლექსის მშენებლობის შემთხვევაში ტერიტორიის შექმნის და ნავმისადგომის აკვატორიასთან მოსვლისას შპს „ტერმინალ1“ წააწყდება შემდეგ სირთულეებს:

  • „ამბასადორი ბათუმი აილენდის“ ნაგებობა დაპროექტებულია შპს „ტერმინალ1“ -ის შემომავალი არხის გასწვრივ, მოახლოებით 40მ. მანძილზე შემომავალი არხის ღერძიდან, რის გამოც შპს „ტერმინალ1“ -ის შემომავალი არხის ფუნქციონირება უსაფრთხო არ იქნება. შემომავალი არხის მიმართულების შეცვლა საჭიროებს ახალ გაანგარიშებებს, სახმელეთო მანიშნებელი ნიშნების გადატანას, ახალი არხის დაღრმავებით სამუშაოებს.
  • იქმნება სივიწროვე გემის მოსაბრუნებელ წრესთან, ღუზის მიცემისა და გემის დასაყენებელ ადგილთან, აქედან გამომდინარე განსაზღვრული გემის მოსაბრუნებელი წრე უსაფრთხო არ იქნება. მოსაბრუნებელი წრის გადატანა საჭიროებს ახალ გაანგარიშებებს.
  • გემის უსაფრთხო დგომა სატვირთო სამუშაოების დროს უზრუნველყოფილია ღუზის შეჭიდულობით ზღვის ფსკერის გრუნტთან. რაც უფრო შორს დევს ღუზა, მით უფრო მყარად დგას გემი. ნაპირგამაგრებითი სამუშაოების შემდეგ, ღუზის ჩაშვების ადგილას გემის კაპიტნებისთვის იქმნება საშიშროება ჩაუშვას ღუზა იქ, სადაც უნდა იყოს ჩაშვებული, ვინაიდან კაპიტნების მოქმედება ეყრდნობა წინაღობების ვიზუალურ გამოვლენას და არსებულ ამინდის პირობებს [დინება, ტალღა, ქარი] აიძულებს ვიზუალურად გაზარდოს უსაფრთხო მანძილი წინაღობამდე, რამაც შეიძლება გამოიწვიოს ღუზის მოწყვეტა ადგილიდან და შემდგომში ავარია.
  • შპს „ ტერმინალ1“-ის ნავმისადგომის განვითარება გულისხმობს სიღრმეების გაზრდას. შემომავალ არხში ნავმისადგომთან და უსაფრთხო ნაპირგამაგრების ექსპლუატაციისათვის სიღრმეების გაზრდა გამოიწვევს „ამბასადორი ბათუმი აილენდი“-ს ნაპირგამაგრების ქანობის დაზიანებას და ჩამოშლას.
  • „ამბასადორი ბათუმი აილენდი“-ს ნაპირგამაგრებისათვის ძალიან მნიშვნელოვანია, რომ ქანობი იყოს ციცაბო, ღუზის მუდმივი მდგომარეობა და მოწყვეტა ფსკერის გრუნტიდან გამოიწვევს ნაპირგამაგრების დაზიანებას.“

სწორედ წარმოდგენილი დოკუმენტაციებიდან გამომდინარე, გარემოს ეროვნულმა სააგენტომ მიიღო გადაწყვეტილება, ბათუმში ხელოვნური კუნძულის მოწყობის გარემოზე ზემოქმედების შეფასების (გზშ) პროცედურის შეჩერებასთან დაკავშირებით.

„ზემოაღნიშნულ წერილებში დასმულ საკითხებთან დაკავშირებით, დაზუსტებული ინფორმაციის/დოკუმენტაციის (მათ შორის შესაბამის უწყებებთან კომპეტენციის ფარგლებში შეთანხმების შესახებ) წარმოდგენამდე სააგენტო მოკლებულია შესაძლებლობას იმსჯელოს გარემოსდაცვითი გადაწყვეტილების გაცემის თაობაზე“, - აღნიშნულია გარემოს ეროვნული სააგენტოს გადაწყვეტილებაში.

შეგახსენებთ, პროექტი „ამბასადორი ბათუმი აილენდი“ ბათუმის ზღვისპირის სივრცეში, „ბარცხანასა” და „თამარის“ დასახლების სანაპიროს აკვატორიაში ორი ხელოვნური ნახევარკუნძულის და ერთი კუნძულის შექმნასა და მათზე ინფრასტრუქტურის მოწყობას მოიცავს. ამჟამად მიმდინარეობს წყალში მიწის მოწყობის სამუშაოები, რის დასრულებასაც რამდენიმე წელი დასჭირდება. ამ ეტაპზე უკვე მოწყობილია 5 ჰექტარამდე მიწის ფართობი. მასზე ინფრასტრუქტურისა და ნაგებობების მშენებლობას, გენერალური გეგმის მიხედვით, კიდევ დამატებითი დრო დასჭირდება. აღსანიშნავია ისიც, რომ ამ პროექტზე „ამბასადორი ბათუმი აილენდს“, საქართველოს ეკონომიკისა და მდგრადი განვითარების სამინისტროსა და აჭარის მთავრობას შორის საინვესტიციო ხელშეკრულება 2021 წლის 29 სექტემბერს გაფორმდა.