ბიუჯეტში სათამაშო ბიზნესის მოსაკრებლიდან შესული თანხა 30%-ით გაიზარდა - რამდენი გადაიხადეს კომპანიებმა
2024 წლის იანვარ-ივლისში ბიუჯეტში სათამაშო ბიზნესის მოსაკრებლიდან და ასევე აზარტული თამაშების მოწყობის ნებართვიდან ჯამში 133 146 984 ლარი შევიდა, რაც 30%-ით მეტია წინა წლის ანალოგიურ პერიოდთან შედარებით. 2023 წელს ბიუჯეტში ამ მუხლებიდან 102 267 603 ლარის აკუმულირება მოხდა - ამის შესახებ აღნიშნულია საქართველოს ნაერთი ბიუჯეტის შემოსულობებში (კონსოლიდაციის გარეშე).
ხაზინის ინფორმაციით, წელს შვიდ თვეში სამორინეს, სათამაშო აპარატების სალონის, ტოტალიზატორის, ლოტოს, ბინგოს და წამახალისებელი გათამაშების მოწყობის ნებართვებიდან ბიუჯეტში 54 880 009 ლარი შევიდა, გასული წლის ანალოგიურ პერიოდში - 38 205 010 ლარი.
რაც შეეხება კონკრეტულად სათამაშო ბიზნესის მოსაკრებელს, წელს ბიუჯეტში 78 266 975 ლარი შევიდა, წინა წლის ანალოგიურ პერიოდში კი 69 062 593 ლარი.
2024 წლის იანვარ-ივლისში ბიუჯეტში შესული 78 266 975 ლარიდან თანხები პუნქტების მიხედვით ასე ნაწილდება:
- სათამაშო აპარატებიდან - 34 007 319 ლარი
- წამახალისებელი გათამაშებიდან - 3 387 490 ლარი
- სისტემურ-ელექტრონული ფორმით ორგანიზებული ტოტალიზატორის თამაშობებიდან - 8 324 933 ლარი
- სხვა არაკლასიფიცირებული სათამაშო ბიზნესის მოსაკრებელი - 32 547 223 ლარი
- კლუბის მაგიდიდან - 1 369 180 ლარი
- სამორინეს მაგიდიდან - 31 087 332 ლარი
- აზარტული ან/და მომგებიანი თამაშობის მოწყობის ნებართვით ორგანიზებული ობიექტის გარეთ განთავსებული, სისტემურ-ელექტრონული ფორმით მოწყობილი აზარტული ან/და მომგებიანი თამაშობის სალარო - 80 009 ლარი
- სხვა დანარჩენი არაკლასიფიცირებული სათამაშო ბიზნესის მოსაკრებელი - 10 702 ლარი
ზოგადად, აზარტული თამაშობები ეს ის ბიზნესია, რომელიც ყოველწლიურად მზარდია. იზრდება როგორც მოსაკრებლიდან ბიუჯეტში შესული თანხა, ასევე ამ ბიზნესის ბრუნვა. კერძოდ, სტატისტიკის ეროვნული სამსახურის მონაცემებით, 2022 წელს სათამაშო ბიზნესის ბრუნვამ 52.647 მლრდ ლარი შეადგინა. ეს კი 2021 წლის მონაცემებთან შედარებით 4.709 მლრდ ლარით, 2020 წელთან შედარებით კი 20.556 მლრდ ლარით მეტია. კერძოდ, 2021 წელს ბრუნვის მოცულობა შეადგენდა 47.938 მლრდ ლარს, 2020 წელს კი 32.091 მლრდ ლარს. მთლიანად კი გასულ წელს სათამაში ბიზნესის წილი ბიზნეს სექტორის მთლიან ბრუნვაში 29% იყო. ცნობისათვის, 2021 წელს ეს მაჩვენებელი იყო 32%, 2020 წელს კი 28%. როგორი იყო ბრუნვის მოცულობა 2023 წელს, მიმდინარე წლის ოქტომბერში გამოაქვეყნებს.