ევროკავშირი ჩინურ ელექტრომობილებზე დაწესებულ დამატებით საბაჟო გადასახადს შეამცირებს

დასავლური მედიის ინფორმაციით, ევროკომისია ჩინეთში წარმოებულ ელექტრომობილებზე დაწესებულ დამატებით საბაჟო გადასახადს შეამცირებს.

ამ კონტექსტში, ჩინეთში წარმოებულ Tesla-ს მოდელებზე გამოყენებული საბაჟო გადასახადი, რომელიც თავდაპირველად 20,8%-ით განისაზღვრა, შემდეგ კი 9%-მდე შემცირდა, საბოლოოდ 7,8%-ზე დადგინდება.

Geely-ის დამატებითი გადასახადის განაკვეთი, რომელიც მანამდე 19,3%-ად იყო განსაზღვრული, 18,8%-მდე შემცირდება. დამატებითი საბაჟო გადასახადი SAIC-ისა და სხვა კომპანიებისთვის 35,3% იქნება. BYD-ის მიმართ დაგეგმილი საბაჟო გადასახადი ადრე გამოცხადებულ 17%-ზე შენარჩუნდება.

ევროკომისიამ 5 ივლისს განაცხადა, რომ ჩინეთში წარმოებული ელექტრომობილების იმპორტზე კავშირის წევრ ქვეყნებში დამატებითი გადასახადი დაწესდებოდა.

ამ გადაწყვეტილებამდე ევროკავშირი ჩინეთიდან იმპორტირებულ ელექტრომობილებზე 10%-იან გადასახადს აწესებდა. მიმდინარე 10%-ს ბოლოს გამოცხადებული გადასახადების განაკვეთები დაემატება.