თამაზ მეჭიაური: "ეროვნული ბანკის შესახებ" კანონში შემოთავაზებული წინადადებებიდან 67 გათვალისწინებულია
"ეროვნული ბანკის შესახებ" კანონში დაგეგმილ ცვლილებებთან დაკავშირებით შემოთავაზებული შენიშვნებიდან და წინადადებებიდან 67 წინადადება გათვალისწინებულია, - ამის თაობაზე პროექტის ერთ-ერთმა ავტორმა, პარლამენტის საფინანსო-საბიუჯეტო კომიტეტის თავმჯდომარემ, თამაზ მეჭიაურმა პარლამენტის პლენარულ სხდომაზე განაცხადა. დეპუტატმა იმ ცვლილებებზე ისაუბრა, რომელიც პროექტის თავდაპირველ ვარიანტში აისახება.
პროექტის პირვანდელი ვარიანტით, საფინანსო სექტორის ზედამხედველობის სააგენტოს საბჭო შემდეგნაირად უნდა დაკომპლექტებულიყო: - საბჭოს შვიდი წევრიდან ექვს კანდიდატს საპარლამენტო სუბიექტები წარადგენდა და მათ თავად პარლამენტი, 76 ხმით დაამტკიცებდა. საბჭოში ერთ ადგილს ავტომატურად ეროვნული ბანკის პრეზიდენტი იკავებდა. შეთავაზებული წინადადებების მიხედვით, რაც, მეჭიაურის თქმით, პროექტში აისახება, საბჭოში იქნება როგორც ეროვნული ბანკის პრეზიდენტი, ასევე კიდევ ერთი ადგილი დამატებით ეძლევა ეროვნულ ბანკს – ეროვნული ბანკის საბჭოს წევრის სახით. სააგენტოს საბჭოს ხუთ წევრს კი, წარადგენს მთავრობა და დაამტკიცებს პარლამენტი.
პროექტის თავდაპირველი ვარიანტით სააგენტოს უფროსს ირჩევდა თავად სააგენტოს საბჭო. მეჭიაურის თქმით, ეს იცვლება და ლეგიტიმაციის გაზრდის მიზნით, სააგენტოს საბჭოს ხელმძღვანელს საბჭოს წარდგენით პარლამენტი დაამტკიცებს. შეიცვლება ზედამხედველობის სააგენტოს საბჭოს გადაწყვეტილებების წესი - თუკი თავდაპირველი ვარიანტით ჯერ უნდა გასაჩივრებული სააგენტოში, ხოლო შემდეგ სასამართლოში, მეჭიაურის განმარტებით, ახლა გასაჩივრება როგორც სააგენტოს საბჭოში, ასევე სასამართლოში.
"ეროვნული ბანკის შესახებ" კანონში დაგეგმილ ცვლილებებს პარლამენტი დღეს პირველი მოსმენით იხილავს. პროექტით, საფინანსო სექტორის ერთადერთი სახელმწიფო საზედამხედველო ორგანო საჯარო სამართლის იურიდიული პირი – საქართველოს საფინანსო ზედამხედველობის სააგენტო იქნება. ეროვნული ბანკის ფარგლებში მოქმედი საფინანსო სექტორის ზედამხედველობის კომიტეტი კი უქმდება.