”დარწმუნებული ვარ, ეროვნული ბანკის შესახებ კანონპროექტი მიიღებს ისეთ სახეს, რომელიც იქნება სასარგებლო სისტემისთვის”
დარწმუნებული ვარ, ეროვნული ბანკის შესახებ კანონპროექტი მიიღებს ისეთ სახეს, რომელიც იქნება სასარგებლო სისტემისთვის და არ იქნება გარკვეული სპეკულაციების საშუალება
ამის შესახებ საქართველოს პარლამენტის თავმჯდომარემ, დავით უსუფაშვილმა ეროვნული ბანკისთვის ზედამხედველობის ფუნქციის გამოყოფის შესახებ კანონპროექტის კომენტირების დროს განაცხადა.
როგორც პარლამენტის თავმჯდომარემ განმარტა, შეფასებები უცხოელი და ქართველი ექსპერტების მხრიდან ეფუძნება კანონპროექტის იმ ვერსიას, რომელიც რამდენიმე კვირის წინ იყო ინიცირებული. უსუფაშვილის თქმით, გუშინ, პარლამენტმა კენჭი უყარა მნიშვნელოვნად გაუმჯობესებულ კანონპროექტს, სადაც უკვე ასახულია ქართველი და უცხოელი ექსპერტების შენიშვნები. პარლამენტის თავმჯდომარე იმედოვნებს, რომ კანონპროექტის შესახებ მსჯელობა იქნება პროფესიული სტანდარტების დონეზე და არ მოხდება საკითხის პოლიტიზება.
"ჯერჯერობით რა შეფასებებიც მოვისმინეთ უცხოელებისგან თუ ადგილობრივი დაინტერესბეული პირებისგან, მათი უმეტესობა ეფუძნებოდა კანონპროექტის იმ ვერსიას, რომელიც იყო ინიცირებული რამდენიმე კვირის წინ. გუშინ პარლამენტმა კენჭი უყარა მნიშვნელოვნად გაუმჯობესებულ კანონპროექტს, რომელშიც ძალიან ბევრი შენიშვნა, მოსაზრება, რომელიც ჰქონდათ ქართველ თუ უცხოელ ექსპერტებს, ასახულია. პარლამეტმა გამოთქვა მზადყოფნა, რომ პირველ და მეორე მოსმენას შორის კიდევ ერთხელ ყველა დაინტერესებულ პირთან ჩატრდეს კონსულტაციები და ყველა საკითხზე მიღწეულ იქნას კომპრომისი... დარწმუნებული ვარ, ეროვნული ბანკის შესახებ კანონპროექტი მიიღებს ისეთ სახეს, რომელიც იქნება სასარგებლო სისტემისთვის და არ იქნება გარკვეული სპეკულაციების საშუალება. ზოგადად, პოლიტიკური პროცესია ნებისმიერი კანონის განხილვა. აქ პოლიტიკურ ვნებათაღელვას ვერ ავცდებით. მაგრამ ჩვენი ამოცანაა, რაც შეიძლება პროფესიული სტანდარტების დონეზე იყოს მსჯელობა და პოლიტიზირება არ იყოს არც ერთი მხრიდან, არც პროექტის მომხრეების და არც მოწინააღმდეგეების მხრიდან", - განაცხადა დავით უსუფაშვილმა.
აღნიშნული განცხადება საქართველოს პარლამენტის თავმჯდომარემ დავით უსუფაშვილმა ბათუმში მიმდინარე შავი ზღვის მე-5 საერთაშორისო კონფერენციის დროს, ჟურნალისტებთან საუბრისას გააკეთა.