გმირთა მოედანზე ესტაკადების საყრდენების რეაბილიტაცია იგეგმება
გმირთა მოედანზე არსებული ესტაკადების ანტისეისმური საყრდენი ნაწილების რეაბილიტაცია იგეგმება. აღნიშნულის შესახებ ირკვევა თბილისის მერიის მიერ გამოცხადებული ტენდერიდან.
უფრო კონკრეტულად, მერიამ სახელმწიფო შესყიდვა რეაბილიტაციისთვის საჭირო საპროექტო-სახარჯთაღრიცხვო დოკუმენტაციის შედგენის მიზნით გამოაცხადა.
სატენდერო დოკუმენტების თანახმად, მიმწოდებელმა ესტაკადების საყრდენის გამოკვლევის დროს უნდა უზრუნველყოს შემდეგი სახის სამუშაოების განხორციელება:
- ანტისეისმური საყრდენების ადგილზე გამოკვლევა;
- ანტისეისმური საყრდენი ნაწილების შემოწმება და ზომების განსაზღვრა;
- ანტისეისმური საყრდენი ნაწილების ტიპის შემოწმება;
- დაზიანების იდენტიფიცირება;
- ანტისეისმური საყრდენი ნაწილების ნახაზების ზოგადი გეგმის მომზადებას და ა.შ.
შესყიდვის სავარაუდო ღირებულება 204 140 ლარია. წინადადებების მიღება 4 ოქტომბერს იწყება და 7 ოქტომბერს სრულდება.
