„ვიღებთ რამდენიმე გადაწყვეტილებას - ყველაზე ხშირად კლიენტი და მოვაჭრე კონკრეტულ პირობებზე თანხმდებიან“
„მას შემდეგ, რაც მომხმარებელი მოგვმართავს, ვიღებთ რამდენიმე ტიპის გადაწყვეტილებას,“ - ამის შესახებ როგორც რადიო „პალიტრასა“ და „პალიტრანიუსის“ გადაცემაში „საქმე“ „კონკურენციისა და მომხმარებლის დაცვის სააგენტოს“ თავმჯდომარემ ირაკლი ლექვინაძემ განაცხადა.
„უკვე მეორე წელია კონკურენციის სააგენტო მომხმარებელთა დაცვის შესახებ კანონს აღასრულებს, რომელიც საუკეთესო ევროპულ კანონმდებლობასთან 85%-ით თავსებადია. 2023 წელს შემოსულ განცხადებებთან შედარებით, 2024 წელს ამ დრომდე უკვე 60%-ით უფრო მეტი განაცხადია შემოსული, რაც იმის დამსახურებაა, რომ ონლაინ-ვაჭრობა ნელ-ნელა სამომხმარებლო კულტურის ნაწილი ხდება. ამასთან, ის არის საკმაოდ ეფექტური საშუალება, დროის დაზოგვის კუთხით და არის რეალური შედეგის მომტანი.
თუ პროდუქციის შეძენისას აღმოჩენილი უკმაყოფილების შემთხვევაში ერთადერთი გამოსავალი იყო სასამართლო, დღეს არსებობს კონკურენციის დაცვის სააგენტო, სადაც ჩვენთან კომუნიკაცია ძალიან მარტივია. ცხელი ხაზის ან მოწერის საშუალებით. განაცხადის/პრეტენზიის დასაფიქსირებლად, ოფისში მოსვლა სულ არ არის აუცილებელი,“ - აცხადებს ლექვინაძე.
მისი თქმით, მას შემდეგ, რაც მომხმარებელი მათ მიმართავს, ისინი იღებენ რამდენიმე ტიპის გადაწყვეტილებას:
„მომხმარებლის მომართვის და საკითხის შესწავლის შემდეგ, სამი ტიპის გადაწყვეტილებას ვიღებთ:
ერთია, როცა დარღვევა დასტურდება, რის შემდეგაც ყველა მოვაჭრეს აქვს გონივრული ვადა, რომ გამოასწოროს აღნიშნული პოლიტიკა, თუ ამას არ იზამს, მხოლოდ ამის შემდეგ ერიცხება ჯარიმა, საკმაოდ სოლიდური და ეს არის ბრუნვის 2%.
მეორეა შეთანხმება - როცა მოვაჭრე ამბობს, რომ აღადგენს კლიენტის უფლებას და ვთანხმდებით საქმის დახურვაზე, რა თქმა უნდა, თუ ყველა პირობა შესრულდა.
მესამე ეს არის მაშინ, როდესაც მომხმარებელს ვეუბნებით, რომ მოვაჭრე მართალია.
ყველაზე მეტი ადგილი უკავია შეთანხმებას, როდესაც ორივე მხარე ვთანხმდებით კონკრეტულ პირობებზე,“ - აღნიშნავს ირაკლი ლექვინაძე.
