რა ეკონომიკური ურთიერთობები აქვს საქართველოს უნგრეთთან, რომლის პრემიერიც თბილისში ჩამოდის
საქართველოს 28-29 ოქტომბერს ოფიციალური ვიზიტით უნგრეთის პრემიერ-მინისტრი ვიქტორ ორბანი ეწვევა. ვიზიტის ფარგლებში საქართველოში ჩამოდის უნგრეთის ვაჭრობის მინისტრი პიტერ სიიარტო, ეკონომიკური განვითარების მინისტრი მარტონ ნადი, უნგრეთის ფინანსთა მინისტრი მიხაი ვარგა და სხვები.
„ბიზნესპრესნიუსი“ დაინტერესდა, რა ეკონომიკური ურთიერთობები აქვს საქართველოს უნგრეთთან.
საქსტატის მონაცემებით, მიმდინარე წლის იანვარ-სექტემბერში საქართველოსა და უნგრეთს შორის სავაჭრო ბრუნვამ 64 მილიონ აშშ დოლარს გადააჭარბა, რაც ბოლო 10 წლის მაქსიმუმია. თუმცა აღსანიშნავია ისიც, რომ ბრუნვაში უდიდესი ნაწილი იმპორტს უკავია. უფრო კონკრეტულად, საქართველომ წელს 61.8 მლნ დოლარის პროდუქცია იყიდა უნგრეთისგან, ექსპორტზე კი მხოლოდ 2.18 მლნ აშშ დოლარი მოდიოდა.
ტურიზმში უნგრეთის წილი საკმაოდ მცირეა. მაგალითისთვის, მიმდინარე წლის 3 კვარტალში საქართველოში უნგრეთიდან 5 688 ვიზიტი განხორციელდა, რაც 7.6%-ით აჭარბებს გასული წლის იმავე პერიოდის მაჩვენებლებს (შარშან სამ კვარტალში 5 286 ვიზიტი).
რაც შეეხება ფულად გზავნილებს, უნგრეთიდან იანვარ-სექტემბერში წელს 1.024 მლრდ დოლარის გზავნილები განხორციელდა, საქართველოდან ფულადმა გზავნილებმა კი 156.8 ათასი აშშ დოლარი შეადგინა.
ცნობისთვის, უნგრეთის პრემიერ-მინისტრი ერთ-ერთია მათ შორის, ვინც „ქართულ ოცნებას“ საპარლამენტო არჩევნებში გამარჯვება მიულოცა. გარდა ორბანისა, „ქართულ ოცნებას“ გამარჯვება სომხეთის პრემიერ-მინისტრმა ნიკოლ ფაშინიანმა და აზერბაიჯანის პრეზიდენტმა ილჰამ ალიევმა მიულოცეს.
განახლება: უნგრეთი ევროკავშირის საბჭოს თავმჯდომარე ქვეყანაა. სულ ახლახანს, ორბანის საქართველოში ვიზიტს გამოეხმაურა ევროკავშირის უმაღლესი წარმომადგენელი საგარეო საქმეთა და უსაფრთხოების საკითხებში, ჯოზეფ ბორელი და აღნიშნა, რომ ორბანი საქართველოში ვიზიტისას არ წარმოადგენს ევროკავშირს.
