დსთ-ს ქვეყნებთან ვაჭრობა 10 წლის მაქსიმუმზეა - რას ვყიდით და ვყიდულობთ

დსთ-ს ქვეყნებთან სავაჭრო ბრუნვა ბოლო 10 წლის (9 თვის ჭრილში) ისტორიულ მაქსიმუმზეა. საქსტატის მონაცემების თანახმად, 2024 წლის იანვარ-სექტემბერში სავაჭრო ბრუნვამ 5.68 მლრდ დოლარს გადააჭარბა, რაც მაგალითად, გასული წლის იმავე პერიოდთან შედარებით, 3.8%-ით, ხოლო 2014 წლის იმავე პერიოდთან შედარებით, 117%-ით არის გაზრდილი.

ამასთანავე, მიმდინარე წლის 9 თვეში საქართველოში დსთ-დან 2.359 მლრდ დოლარის პროდუქციის იმპორტი განხორციელდა, რაც 10 წლის ჭრილში მხოლოდ 2022-2023 წლების მონაცემებზე ნაკლებია. წელს დსთ-ს ქვეყნებიდან იმპორტში ძირითადი ადგილი შემდეგ 5 პროდუქტს უკავია:

• ნავთობი და ნავთობპროდუქტები - 591.8 მლნ დოლარის;
• ნავთობის აირები და აირისებრი ნახშირწყალბადები - 275 მლნ აშშ დოლარის;
• წნელები ნახშირბადიანი ფოლადის - 77.3 მლნ აშშ დოლარის;
• ხორბალი და მესლინი - 52.19 მლნ აშშ დოლარის;
• ბოცები, ბოთლები - 49.39 მლნ აშშ დოლარი.

გარდა ამისა, მონაცემები აჩვენებს, რომ ბოლო 10 წლის ისტორიულ მაქსიმუმზეა დსთ-ს ქვეყნებთან ექსპორტი. მაგალითისთვის, მიმდინარე წლის იანვარ-სექტემბერში 3.32 მლრდ აშშ დოლარის პროდუქციის ექსპორტი განხორციელდა, რაც წლიურად 8.9%-იან ზრდას აჩვენებს.

საანგარიშო პერიოდში საქართველოდან დსთ-ს ქვეყნებში შემდეგი 5 ძირითადი პროდუქციის რეექსპორტი განხორციელდა:

• მსუბუქი ავტომობილები - 1.73 მლრდ დოლარის;
• ეთილის სპირტი, სპირტის კონცენტრაციით 80 მოც.%-ზე ნაკლები, სპირტიანი სასმელები - 105 მლნ დოლარის;
• სამკურნალო საშუალებები დაფასოებული - 67.2 მლნ აშშ დოლარის;
• სიგარები - 45.8 მლნ აშშ დოლარის;
• სატვირთო ავტომობილები - 42.7 მლნ აშშ დოლარის.

მიუხედავად იმისა, რომ ქართული პროდუქციის ექსპორტიც ისტორიულ მაქსიმუმზეა, 2024 წელს ექსპორტში ადგილობრივი ექსპორტის წილი მაინც მცირე, 24.6% იყო, დანარჩენი კი რეექსპორტზე მოდიოდა. კერძოდ, მიმდინარე წელს დსთ-ს ქვეყნებში 818 მილიონი დოლარის ღირებულების ქართული პროდუქციის ექსპორტი განხორციელდა.

რაც შეეხება 5 ძირითად პროდუქციას, რაც საქართველოს დსთ-ს ქვეყნებში გააქვს, ასე გამოყურება:

• ყურძნის ნატურალური ღვინოები - 170 მილიონი აშშ დოლარის;
• მინერალური და მტკნარი წყლები - 113 მილიონი აშშ დოლარის
• წყლები, მინერალურისა და დაგაზიანებულის ჩათვლით, შაქრის დანამატების შემცველობით - 101 მილიონი აშშ დოლარის;
• ეთილის სპირტი არადენატურირებული, სპირტის კონცენტრაციით 80 მოც.%-ზე ნაკლები, სპირტიანი სასმელები - 79 მლნ აშშ დოლარის;
• გარგარი, ალუბალი და ბალი, ატამი, ქლიავი და ღოღნოშო - 33 მლნ აშშ დოლარის.

იხილეთ ასევე: ევროკავშირში ქართული პროდუქციის ექსპორტი 10-წლიან მინიმუმზეა