შემცირებული ვაჭრობა და გაზრდილი გზავნილები - როგორია საქართველოსა და აშშ-ის ურთიერთობა რიცხვებში
დღეს აშშ-ისთვის მნიშვნელოვანი დღეა, რიგით მე-60 საპრეზიდენტო არჩევნები იმართება. შედეგად, გადაწყდება ვინ მართავს ქვეყანას მომდევნო ოთხი წლის განმავლობაში - „დემოკრატიული პარტიის“ კანდიდატი, ვიცე-პრეზიდენტი კამალა ჰარისი, თუ „რესპუბლიკელი“ კანდიდატი, ყოფილი პრეზიდენტი დონალდ ტრამპი.
იქიდან გამომდინარე, რომ აშშ-ი საქართველოსთვის მნიშვნელოვანი სტრატეგიული პარტნიორია, bpn.ge დაინტერესდა, როგორია ქვეყნებს შორის ეკონომიკური ურთიერთობა.
სტატისტიკის ეროვნული სამსახურის მონაცემებით, წელს იანვარ-სექტემბერში, 2023 წლის 9 თვესთან შედარებით, საქართველოსა და აშშ-ის შორის სავაჭრო ბრუნვა შემცირებულია, თუმცა 2009 წლის ჩათვლით, ყველა გასული წლის ანალოგიურ პერიოდთან შედარებით, გაზრდილი (საგარეო ვაჭრობის პორტალზე აღნიშნული მონაცემები 2009 წლიდან არის ხელმისაწვდომი).
უფრო კონკრეტულად, წელს იანვარ-სექტემბერში ქვეყნებს შორის 1.472 მლრდ აშშ დოლარის ვაჭრობა შედგა, წინა წლის ანალოგიურ პერიოდში 1.645 მლრდ აშშ დოლარის, 2022 წლის იანვარ-სექტემბერში 940.6 მლნ აშშ დოლარის, 2021 წლის იგივე საანგარიშო პერიოდში - 595.9 მლნ აშშ დოლარის, 2020 წლის 9 თვეში - 487.6 მლნ აშშ დოლარის და ა.შ.
ამასთან, წელს, იანვარ-სექტემბერში, 95.6 მლნ აშშ დოლარი საქართველოდან ექსპორტზე მოდის, ხოლო 1.376 მლრდ აშშ-იდან იმპორტზე. რაც შეეხება ადგილობრივ ექსპორტს, საანგარიშო პერიოდში 88.6 მლნ აშშ დოლარი შეადგინა.
სტატისტიკის მიხედვით, საქართველოდან ექსპორტირებულ პროდუქტებს შორის ლიდერია ფეროშენადნობები, აშშ-იდან იმპორტირებულს შორის კი მსუბუქი ავტომობილები.
კერძოდ, საქართველოდან აშშ-ში ექსპორტირებული პროდუქტების ხუთეული ასე გამოიყურება:
- ფეროშენადნობები - 59.093 მლნ აშშ დოლარი
- ყურძნის ნატურალური ღვინოები - 5.951 მლნ აშშ დოლარი
- საფრენი აპარატების ნაწილები - 5.225 მლნ აშშ დოლარი
- მილები, მილაკები და ღრუ პროფილები, უნაკერო, შავი ლითონისაგან - 4.951 მლნ აშშ დოლარი
- ხილისა და ბოსტნეულის წვენები - 3.813 მლნ აშშ დოლარი
აშშ-იდან საქართველოში იმპორტირებული ტოპ-5 პროდუქტი:
- მსუბუქი ავტომობილები - 1.249 მლრდ აშშ დოლარი
- თხილი და სხვა კაკალი - 18.679 მლნ აშშ დოლარი
- კოსმეტიკური საშუალებები ან მაკიაჟისა და კანის მოვლის საშუალებები - 4.598 მლნ აშშ დოლარი
- მოტოციკლები და ველოსიპედები, ეტლით ან მის გარეშე; ეტლები - 4.442 მლნ აშშ დოლარი
- ხორცი და კვების სუბპროდუქტები შინაური ფრინველის, ახალი, გაცივებული ან გაყინული - 4.247 მლნ აშშ დოლარი
ასევე საქსტატის მონაცემებით, წელს I და II კვარტალში აშშ-იმ საქართველოში ჯამურად 52.1 მლნ აშშ დოლარის ინვესტიცია განახორციელა, რაც 37%-ით ნაკლებია წინა წლის იგივე პერიოდის მაჩვენებელზე. 2023 წლის პირველ და მეორე კვარტალში ამერიკულმა ინვესტიციებმა 82.6 მლნ აშშ დოლარი შეადგინა.
რაც შეეხება ტურისტების რაოდენობას, წელს 3 კვარტლის მდგომარეობით ამერიკელი ვიზიტორებს რაოდენობა 14.8%-ით არის გაზრდილი. კერძოდ, 2024 წლის I-III კვარტალში აშშ-იდან 54 528 ტურისტი ეწვია საქართველოს, წინა წლის იგივე პერიოდში - 47 482.
აღსანიშნავია ისიც, რომ ეროვნული ბანკის მონაცემებით, ფულადი გადმორიცხვებით აშშ საქართველოსთვის მეორე ადგილზეა. სტატისტიკის მიხედვით, წელს სექტემბერში ამერიკიდან 49.033 მლნ აშშ დოლარი გადმოირიცხა, წინა წლის ანალოგიურ პერიოდში 41.663 მლნ აშშ დოლარი.
