საქართველოდან ფულადი გზავნილები 12%-ით გაიზარდა - სად გადაირიცხა ყველაზე მეტი თანხა
2024 წლის ოქტომბერში საქართველოდან უცხოეთში 35.685 მლნ აშშ დოლარი გადაირიცხა, რაც გასული წლის ანალოგიურ მაჩვენებელზე 12%-ით მეტია. ეროვნული ბანკის მონაცემებით, 2023 წლის ოქტომბერში ქვეყნიდან უცხოეთში 31.833 მლნ აშშ დოლარი გაიგზავნა.
აღსანიშნავია, რომ როგორც შარშან, წელსაც გადარიცხვებში ყველაზე დიდი წილი თურქეთზე მოდის. ათეულშია რუსეთი, უკრაინა, აზერბაიჯანი, ყაზახეთი, უზბეკეთი და ა.შ.
10 ქვეყანა, სადაც 2024 წლის ოქტომბერში ყველაზე მეტი ფული გადაირიცხა:
- თურქეთი - 8.400 მლნ დოლარი
- აზერბაიჯანი - 4.652 მლნ დოლარი
- რუსეთი - 3.907 მლნ დოლარი
- უკრაინა - 2.242 მლნ დოლარი
- საბერძნეთი - 1.959 მლნ დოლარი
- უზბეკეთი - 1.710 მლნ დოლარი
- ყაზახეთი - 1.478 მლნ დოლარი
- იტალია - 1.223 მლნ დოლარი
- აშშ - 1.181 მლნ დოლარი
- გერმანია - 1.181 მლნ დოლარი
რაც შეეხება საქართველოში გადმორიცხვებს, 2024 წლის ოქტომბერში, წინა წლის ანალოგიურ პერიოდთან შედარებით 1.5%-ით შემცირდა. კერძოდ, თუ გასულ თვეს ქვეყანაში 281.060 მლნ დოლარი გადმოირიცხა, 2023-ის ოქტომბერში გზავნილების მოცულობა 285.439 მლნ დოლარი იყო.
ქვეყნების მიხედვით კი, 2024 წლის ოქტომბერში ყველაზე მეტი თანხა აშშ-დან გადმოირიცხა - 50.873 მლნ დოლარი, მეორე ადგილზეა იტალია - 47.326 მლნ დოლარით, მესამეზე რუსეთი - 34.373 მლნ დოლარი. ამასთან, ხუთეულში შედიან - გერმანია 24.536 მლნ დოლარით და საბერძნეთი - 22.772 მლნ დოლარით.