დავით იაკობიძე - ჩვენი სუვერენიტეტის მთავარი მცველი, უარს ამბობს ჩვენთან თანამშრომლობაზე. რა სინდისით მოვიწონო ამ უბედურების გამომწვევი ადამიანების საქმიანობა

საქართველოს ყოფილი ფინანსთა მინისტრი (1991-1995 წლებში) დავით იაკობიძე აშშ-ის მიერ საქართველოსთან სტრატეგიული პარტნიორობის მექანიზმის შეჩერებას სოციალურ ქსელში ეხმაურება. მისი თქმით, „ჩვენი ტერიტორიული მთლიანობის მთავარი გარანტი უარს ამბობს ჩვენთან თანამშრომლობის მიმდინარე მეგობრულ ფორმატზე. როგორ, რა სინდისით მოვიწონო ამ უბედურების გამომწვევი ადამიანების საქმიანობა“.

დავით იაკობიძის პოსტს უცვლელად გთავაზობთ:

1994 წლის თებერვალ-მარტში საქართველოს პირველი დელეგაცია იმყოფებოდა ამერიკის შეერთებულ შტატებში. მზადდებოდა ჩვენი პრეზიდენტის ედუარდ შევარდნაძის სამ დღიანი (15,16,17 მარტი) ვიზიტი თეთრ სახლში. სწორედ მაშინ მოეწერა ხელი ამერიკა საქართველოს სამოკავშირეო ხელშეკრულებას ხელი.

ამ სამოკავშირეო სტრატეგიული პარტნიორობის ხელშეკრულებას დიდხანს ამზადებდნენ ჩვენი დიპლომატები. ედუარდ შევარდნაძე მკაცრად აკონტროლებდა პროცესს და ყველა ნიუანსს, ყველა დეტალს ყურადღებით განიხილავდა. ხელშეკრულების და მასთან დაკავშირებულ თემატიკაზე მუშაობდა საქართველოს მთელი აღმასრულებელი ხელისუფლება. საორგანიზაციო საქმიანობს უძღვებოდა ალექსანდრე ჩიკვაიძე, გელა ჩარკვიან, თემო სტეპანოვი და სხვები.

დელეგაციას, რომელიც ჩვენი პრეზიდენტის ვიზიტს ამზადებდა ირაკლი მენაღარიშვილი ხელმძღვანელობდა, რომელიც ჩვენს ელჩთან აშშ-ში, პეტრე ჩხეიძესთან ერთად კოორდინაციას უწევდა მრავალრიცხოვანი დელეგაციის ცალკეული წევრის საქმიანობას. ხელშეკრულების ტექსტზე რომელსაც ათანხმებდნენ ამერიკული გოვერმენტის ცალკეულ სტრუქტურებთან პასუხისმგებლობას იღებდნენ თედო ჯაფარიძე თავისი პატარა გუნდით, რომელთა შორის გამოირჩეოდნენ გიგა მახარაძე და არჩილ გეგეშიძე.

პრეზიდენტ კლინტონსა და შევარდნაძეს შორის მოლაპარაკება წარმატებით დამთავრდა და მოხდა უპრეცედენტო შემთხვევა, საქართველოს სხვა სსრკ-ს დაშლის შედეგად წარმოქმნილ სახელმწიფოთა შორის, პირველს მოუწერა ხელი აშშ-მ სტრატეგიულ პარტნიორობაზე. ასეთი სანდო და თბილი ურთიერთობების ჩამოყალიბების მთავარ მიზეზად პიროვნული ფაქტორი მიგვაჩნდა. ედუარდ შევარდნაძის უდიდესი პოლიტიკური ავტორიტეტი და ბატონი ჯონ შალიკაშვილის დაინტერესებულობაც მხედველობაშია მისაღები.

ჩვენი დელეგაციის სიხარულს საზღვარი არ ჰქონდა. იქ გახლდით, ნოდარ ჯავახიშვილთან და გიზო გელეიშვილთან ერთად მსოფლიოს ბანკთან და მსოფლიო მონეტარულ ბანკთან მოლაპარაკებებში ვმონაწილეობდი.

ახლა როდესაც თითქმის 31 წელი გავიდა ამ ხელშეკრულების დადებიდან, ამერიკის მხარე აჩერებს მის სტრატეგიულ ფორმატს. ჩვენი სუვერენიტეტის მთავარი მცველი, ჩვენი ტერიტორიული მთლიანობის მთავარი გარანტი უარს ამბობს ჩვენთან თანამშრომლობის მიმდინარე მეგობრულ ფორმატზე. როგორ, რა სინდისით მოვიწონო ამ უბედურების გამომწვევი ადამიანების საქმიანობა“, - წერს დავით იაკობიძე.

ცნობისათვის, ამერიკის შეერთებულმა შტატებმა საქართველოსთან სტრატეგიული პარტნიორობა ორიოდე დღის წინ შეაჩერე. ამის შესახებ სახელმწიფო დეპარტამენტის პრესსპიკერმა მეთიუ მილერმა X-ის საკუთარ გვერდზე დაწერა.

"აშშ ევროკავშირთან ერთად წუხს "ქართული ოცნების გადაწყვეტილების გამო, შეაჩეროს ევროკავშირში გაწევრიანება. ჩვენ ვგმობთ ქართველების წინააღმდეგ გამოყენებულ გადამეტებულ ძალას, რომლებიც ლეგიტიმურად აპროტესტებენ მათი კონსტიტუციის ამ ღალატს - ევროკავშირი საყრდენი ძალაა კრემლის წინააღმდეგ. შესაბამისად, ჩვენ შევაჩერეთ საქართველოსთან სტრატეგიული პარტნიორობა," - წერს მილერი.