აქტივების ბლოკირება, სავაჭრო ოპერაციების სრული შეწყვეტა - რას მოიცავს ზელენსკის მიერ დაწესებული სანქციები
უკრაინის პრეზიდენტმა საქართველოს ყოფილი პრემიერ-მინისტრი და "ქართული ოცნების" საპატიო თავმჯდომარე ბიძინა ივანიშვილი, ასევე მისი გარემოცვა დაასანქცირა. განკარგულების მიხედვით, რომელსაც ვოლოდიმირ ზელენსკიმ ხელი უკვე მოაწერა, სანქციები შეეხება ივანიშვილისა და მისი გუნდის 18 წევრს, რომლებიც, უკრაინის პრეზიდენტის თქმით, "საქართველოს და ხალხის ინტერესებს ყიდის”.
ოფიციალური დოკუმენტის თანახმად, სიაში არიან: ბიძინა ივანიშვილი, კახა კალაძე, ირაკლი კობახიძე, გრიგოლ ლილუაშვილი, მიხეილ ჩინჩალაძე, მამუკა მდინარაძე, ვახტანგ გომელაური, ოთარ ფარცხალაძე, ირაკლი რუხაძე, ლევან მურუსიძე, ვიქტორ ჯაფარიძე, დიმიტრი სამხარაძე, გიორგი ხაინდრავა, გიორგი კობახიძე, ზვიად შალამბერიძე, შალვა თადუმაძე, თეა წულუკიანი, ირაკლი ქარსელაძე და კახა ბექაური.
როგორც რადას ვებ-გვერდზე გამოქვეყნებულ დოკუმენტში ვკითხულობთ, აღნიშნულ პირებს შეზღუდვები უწესდებათ დაახლოებით 18 მიმართულებით, რომელთა შორის არის აქტივების ბლოკირება, ფრენების აკრძალვა, აქტივების ქვეყნიდან გატანის შეზღუდვა, ფინანსური ვალდებულებების შეჩერება და ა.შ.
უფრო კონკრეტულად, უკრაინის პრეზიდენტის ვოლოდიმირ ზელენსკის მიერ გამოცემული ბრძანებით, შეზღუდვების ძირითადი ნაწილი, რომელიც დასანქცირებულ პირებს, მათ შორის ბიძინა ივანიშვილს და მისი გარემოცვის წევრებს შეეხება, ასე გამოიყურება:
- აქტივების ბლოკირება - დროებით ჩამოერთვას ქონებისა თუ აქტივების ფლობისა და განკარგვის უფლება (უკრაინაში);
- სავაჭრო ოპერაციების სრული შეწყვეტა;
- უკრაინის ტერიტორიაზე ფრენებისა და ტრანსპორტირების სრული აკრძალვა;
- უკრაინიდან კაპიტალის გატანის შეზღუდვა;
- ეკონომიკური და ფინანსური ვალდებულებების შეჩერება;
- უკრაინის ტერიტორიაზე, გარკვეული საქმიანობისთვის საჭირო ლიცენზიებისა და სხვა ნებართვების შეწყვეტა;
- სახელმწიფო ქონების იჯარაში მონაწილეობის აკრძალვა;
- უკრაინის ტერიტორიულ ზღვაში, მის შიდა წყლებში, პორტებში არასამხედრო და სამხედრო გემების შესვლის სრული აკრძალვა, ისევე როგორც უკრაინის საჰაერო სივრცეში თვითმფრინავების დაშვება;
- ფასიან ქაღალდებთან მიმართებით ოპერაციების აკრძალვა;
- სავაჭრო ხელშეკრულებების და სხვა ერთობლივი პროექტების შეწყვეტა, უსაფრთხოების სფეროში;
- ოფიციალური ვიზიტების, შეხვედრების, ხელშეკრულებების ან შეთანხმებების გაფორმებაზე მოლაპარაკებების გაუქმება;
- უკრაინის სახელმწიფო ჯილდოებისა თუ სხვა აღიარებების ჩამორთმევა;
- მიწის ნაკვეთების შეძენა.
პრეზიდენტი მოუწოდებს აშშ-ს, ევროპასა და მსოფლიო ლიდერებს, ამ საკითხთან დაკავშირებით “ერთად და პრინციპულად იმოქმედონ,” რადგან, თუ რეაგირება დროული არ იქნება ან ისინი უპრინციპოდ იმოქმედებენ, მაშინ ათწლეულები დაიკარგება და ქვეყნები თავისუფლებას დაკარგავენ.
„ამ რეგიონში არავის დაკარგვა არ შეიძლება, არც საქართველოს, არც მოლდოვასი და არც უკრაინის,“ - აცხადებს ზელენსკი, რომელმაც ამ ქვეყნების მოსახლეობას მოუწოდა, რომ მოსკოვისგან თავი ერთად დაიცვან.
