კახა კალაძე: უეფას სუპერთასისთვის მოსამზადებელი სამუშაოების 90 პროცენტი შესრულებულია

ვიცე-პრემიერის, ენერგეტიკის მინისტრ კახა კალაძის განცხადებით, უეფას სუპერთასისთვის მოსამზადებელი სამუშაოების 90 პროცენტი შესრულებულია, - ამის შესახებ კახა კალაძემ ჟურნალისტებს გუშინ, უეფას სუპერთასისთვის მოსამზადებელი სამთავრობო კომისიის სხდომის დასრულების შემდეგ განუცხადა.

როგორც კალაძემ აღნიშნა, მოისმინეს, თუ რა მდგომარეობაა სამუშაოების კუთხით. "თქვენ იცით, რომ პრემიერის დავალებით შეიქმნა ეს სამთავრობო კომისია, რომ ჩვენ მოგვეწესრიგებინა დინამო-არენა, რათა ასეთი მაღალი დონის შეხვედრას ღირსეულად დავხვედროდით. ჩვენ მოვისმინეთ ფეხბურთის ფედერაციის ხელმძღვანელობისგან ძალიან მნიშვნელოვანი რამ, რაც ძალიან აღელვებს ქართველ გულშემატკივრებს. ეს არის ბილეთებთან დაკავშირებით არსებული პრობლემა. მათ გვითხრეს, რომ მიიღეს გადაწყვეტილება, რომ ბილეთების გაყიდვა მოხდება მიხეილ მესხის სახელობის სტადიონის სალაროებში", - განაცხადა გუშინ კახა კალაძემ.

მისივე თქმით, მნიშვნელოვანია ისიც, რომ 22 ათასი ბილეთი გაიყიდება მხოლოდ საქართველოს მოქალაქეებზე. როგორც კალაძემ აღნიშნა, მნიშვნელოვანია ასევე, რომ გულშემატკივრებს თან ჰქონდეთ პირადობის მოწმობები, ID ბარათები და პასპორტები და ერთ ადამიანს შეეძლება მხოლოდ 4 ბილეთის შეძენა.  "90 პროცენტი სამუშაოების შესრულებულია. ეს იყო შესასვლელი ტურნიკეტები, განათება, რომელიც არის ძალიან მაღალი დონის, ასევე კამერები უსაფრთხოების მიზნით, ასევე ტაბლო, რომელიც არის ერთ-ერთი საუკეთესო, ელექტროენერგიის მიწოდების ალტერნატიული ხაზი, გასახდელების მოწყობა, 15-20 ივლისისთვის ყველა სამუშაო იქნება დასრულებული", - განაცხადა კალაძემ.

მისივე თქმით, უშუალოდ უეფას სუპერთასისთვის მოსამზადებელ სამთავრობო კომისიას ბილეთებთან არანაირი შეხება არ ჰქონია. მისივე თქმით, კომისიის მთავარი მიზანი იყო სტადიონის მოწყობა, მოპირკეთება, რომ ამ მაღალი დონის თამაშს "დინამო-არენა" ღირსეულად შეხვედროდა, რაც გაკეთდება კიდეც.

სუპერთასის ბილეთების გაყიდვა მიხეილ მესხის სახელობის სტადიონის სალაროებში 12 ივლისს, 09.00 საათზე დაიწყება.