ვინ გახდება Time-ის “2024 წლის ადამიანი” - ჟურნალმა კანდიდატთა სია გამოაქვეყნა
ამერიკულმა ჟურნალ Time-მა “2024 წლის ადამიანის” კანდიდატთა სია გამოაქვეყნა, რომელთა შორისაც არჩეული პრეზიდენტი, დონალდ ტრამპი, მისი მხარდამჭერი და მილიარდერი, ილონ მასკი და რუსი დისიდენტის, ალექსეი ნავალნის ქვრივი, იულია ნავალნაია არიან.
Time-ის ნომინანტთა სია 10 პირს მოიცავს:
კამალა ჰარისი - აშშ-ის საპრეზიდენტო კანდიდატი 5 ნოემბრამდე და მოქმედი ვიცეპრეზიდენტი. ის ჟურნალის გარეკანზე 2020 წელს ამერიკის ამჟამინდელ ლიდერ ჯო ბაიდენთან ერთად უკვე იყო.
ქეით მიდლტონი - უელსის პრინცესა, რომელიც დიდხანს ებრძოდა კიბოს და ქიმიოთერაპია მიმდინარე წლის სექტემბერში დაასრულა.
ილონ მასკი - ამერიკელი ბიზნესმენი, რომელსაც Time-მა „ინოვაციის ძრავა“ უწოდა. ჟურნალის ცნობით, მილიარდერმა წელს თავი გამოიჩინა პოლიტიკურ სფეროში, როცა აშშ-ის საპრეზიდენტო არჩევნებში დონალდ ტრამპს ღიად დაუჭირა მხარი.
იულია ნავალნაია - რუსი ოპოზიციონერის, ალექსეი ნავალნის ცოლი, რომელიც იამალო-ნენეცის ოლქის კოლონიაში მიმდინარე წლის 16 თებერვალს გარდაიცვალა.
ბენიამინ ნეთანიაჰუ - ისრაელის პრემიერ-მინისტრი, რომელსაც ჟურნალ Time-მა “წლის ერთ-ერთი ყველაზე გავლენიანი და საკამათო ლიდერი” უწოდა.
ჯერომ პაუელი - 2018 წლიდან აშშ-ის ფედერალური სარეზერვო სისტემის ხელმძღვანელი, რომელიც ეკონომიკაში მთავარ ფიგურად რჩება.
ჯო როგანი - პოდკასტ The Joe Rogan Experience-ის ცნობილი წამყვანი, რომელიც პრეზიდენტ ვოლოდიმირ ზელენსკის აკრიტიკებს და აცხადებს, რომ უკრაინა თანამედროვეობას „მესამე მსოფლიო ომამდე მიიყვანს.“
კლაუდია შეინბაუმი - რომელმაც ისტორიული ნაბიჯი გადადგა და მექსიკის პირველი ქალი პრეზიდენტი გახდა.
დონალდ ტრამპი - რომლის გამარჯვებასაც Time-მა „ისტორიული“ უწოდა. ის აშშ-ის უხუცესი და, ამავე დროს, პირველი პრეზიდენტი იქნება, ვინც პოსტზე თაღლითობის 34-ვე ბრალდებით გასამართლების შემდეგ აირჩიეს.
მარკ ცუკერბერგი - The Times წერს, რომ ის მსოფლიოს ერთ-ერთ უმდიდრეს ადამიანად რჩება, რომელიც ტექნოლოგიურ ინდუსტრიაზე გავლენას განაგრძობს.
ცნობისთვის: 2022 წელს Times-ის "წლის ადამიანი" ვოლოდიმირ ზელენსკი გახდა, ხოლო 2023 წელს ეს ნომინაცია ამერიკელ მომღერალ ტეილორ სვიფტს მიენიჭა.
მოამზადა ლადო სულაბერიძემ