ვენაში, ირანსა და „ექვსეულს“ (აშშ, დიდი ბრიტანეთი, საფრანგეთი, გერმანია, ჩინეთი და რუსეთი) მიღწეული შეთანხმების ფონზე მსოფლიო ბაზარზე ნავთობის ფასი დაეცა.
„ბლუმბერგის“ ინფორმაციით, დღეს დილით „ბრენტის“ მარკის ნავთობზე ფასი 0,99%-ით შემცირდა და ბარელზე 57,28 დოლარი შეადგინა, WTI-ის ნედლი ნავთობი კი 1,30%-ით, 51,52 დოლარამდე გაიაფდა. ირანმა და ექვსეულმა თეირანის წინააღმდეგ დაწესებული სანქციების გაუქმების სანაცვლოდ, ირანის ბირთვულ პროგრამაზე შეთანხმებას მიაღწიეს.
„ბიბისის“ ინფორმაციით, შეთანხმების თანახმად, ირანი საკუთარ ობიექტებზე მონიტორინგის მიზნით გაერო-ს ბირთვული იარაღის ინსპექტორებს შეუშვებს. ირანი თანახმაა სანქციების აღდგენაზე 65 დღის განმავლობაში, თუ თეირანი შეთანხმებას დაარღვევს. „როიტერის“ ცნობით, გაერო-ს მიერ იარაღზე დაწესებული ემბარგო და სარაკეტო სანქციები ძალაში რჩება შესაბამისად, ხუთი და რვა წლის განმავლობაში.