საქართველოში ყველისა და ხაჭოს იმპორტი გაიზარდა - სად ვყიდულობთ და რამდენად
საქართველოში ყველისა და ხაჭოს იმპორტი თითქმის 23%-ით გაიზარდა. სტატისტიკის ეროვნული სამსახურის მონაცემებით, გასული წლის იანვარ-მარტში ქვეყანაში იმპორტირებულია 1364 ტონა ყველი და ხაჭო (ჯამში 6.88 მლნ დოლარის), ხოლო 2025 წლის იმავე პერიოდში 1 673 ტონა (სულ 8.7 მლნ დოლარის ღირებულების).
2025 წლის პირველ სამ თვეში საქართველო აღნიშნულ პროდუქციას ძირითადად შემდეგი 5 ქვეყნისგან ყიდულობდა:
- თურქეთი - 1.4 მილიონი აშშ დოლარის 394 ტონა;
- გერმანია - 1.37 მილიონი აშშ დოლარის 230 ტონა;
- რუსეთი - 941 ათასი აშშ დოლარის 228 ტონა;
- პოლონეთი - 1.1 მილიონი აშშ დოლარის 192 ტონა;
- ნიდერლანდები - 636 ათასი აშშ დოლარის 95 ტონა.
აღსანიშნავია ისიც, რომ წელს საქართველოს ყველისა და ხაჭოს იმპორტი გაუძვირდა. შარშან 1 კგ-ის საშუალო საიმპორტო ფასი თუ 5 დოლარი იყო, წელს ღირებულება გადასახადების გარეშე 5.2 დოლარამდეა გაზრდილი.
რაც შეეხება ქართული ყველის ექსპორტს, საანგარიშო პერიოდში დაახლოებით 15%-ით გაიზარდა. კერძოდ, შარშან ექსპორტზე გავიდა 146 ათასი დოლარის ღირებულების 12.4 ტონა ქართული ყველი და ხაჭო, ხოლო წელს იანვარ-მარტში 165.6 ათასი დოლარის 14.2 ტონა.
გასულ წელს 1 კგ ქართული ყველისა და ხაჭოს ექსპორტი გადასახადების გარეშე 11.8 დოლარი ჯდებოდა, წელს კი ფასი მცირედით - 11.7 დოლარამდე შემცირდა.
2025 წლის იანვარ-მარტში ქართული ყველი და ხაჭო სულ ოთხ ქვეყანაში გავიდა ექსპორტზე, კერძოდ:
- აშშ - 122 710 დოლარის 11.24 ტონა;
- კანადა - 27 470 დოლარის 1.98 ტონა;
- არაბთა გაერთიანებული საამიროები - 14 180 დოლარის 900 კგ;
- ქუვეითი - 1 340 დოლარის 70 კგ.
