უძრავი ქონების ბიზნესი ზაფხულის ძილშია

კიდევ ერთი თვე ძვრა არ იქნება

უძრავი ქონების ბაზარზე ზაფხულისთვის დამახასიათებელი უძრაობაა. ბროკერების შეფასებით, გარდა იმისა, რომ პრობლემა სეზონურია, ბოლო პერიოდში ამ ბიზნესს ისედაც დიდი ჩავარდნა აქვს. ზაფხულის შეთავაზებების მიუხედავად, თბილისში ბინების როგორც ყიდვა-გაყიდვა, ასევე დაქირავებაც ჭირს, ხოლო გირაოზე თითქმის არ არის მოთხოვნა.

უძრავი ქონების სააგენტოებში აცხადებენ, რომ დედაქალაქის თითქმის ყველა უბანში ბინების ფასმა 10-15 %-ით დაიწია, მაგრამ ბაზარს ვერც ამან უშველა. ყველაზე მაღალი მაზანდა კვლავ ძველ თბილისში, ვაკესა და ვერაზეა. ვაკეში 1 კვ.მ თეთრი კარკასი, საშუალოდ, 900 დოლარად იყიდება, ნაცვლად რამდენიმე თვის წინანდელი 1100-1200 დოლარისა. საბურთალოზე 1 კვადრატულის ფასი 600-800 დოლარს შორის მერყეობს. ფეშენებელური კორპუსის შემთხვევაში, ვაკესა და მთაწმინდაზე 1კვ.მ-ის ფასი 2000 დოლარამდეც ადის.

უძრავი ქონების სააგენტო „კიბეს“ წარმომადგენელი ნელი გოგუაძე ამბობს, რომ მდგომარეობის გამოსწორებას აგვისტოს ბოლომდე ელოდება.

თუმცა, სააგენტოს მხრიდან აქცენტი არა ბინის ყიდვა-გაყიდვაზე, არამედ ქირაზე გაკეთდება, რისთვისაც აგვისტო-სექტემბერი ყველაზე ხელსაყრელი პერიოდია.  „უძრავი ქონების ბაზარზე სეზონურობა მკვეთრად აისახება. რეალიზაციის მხრივ პრობლემა ისედაც მოსალოდნელი იყო, მაგრამ წარუმატებლობის მიზეზი მხოლოდ ეს არ არის. რამდენიმე თვის წინათ პრობლემა ამ ბიზნესში სავალუტო კრიზისმა წარმოშვა, მდგომარეობის გამოსწორება ჯერჯერობით ჭირს, მით უმეტეს, არც ეროვნული ვალუტა გამოიყურება მყარად. იმ კლიენტებმა, რომლებიც ბინის შეძენას აპირებდნენ, ზაფხულის სეზონის გამო ინტერესი შეანელეს და დასვენება აირჩიეს. სერიოზული ბიძგი გვჭირდება, რაც ბაზარს გამოაცოცხლებს. ამ მხრივ ყველაზე მეტ შედეგს ინვესტიციების მოზიდვა მოგვცემს. ჯერჯერობით კი ეს არ იკვეთება, ამდენად, მთლიანად გაქირავება-დაგირავებაზე მოგვიწევს გადართვა, რომლის სეზონიც აგვისტოს ბოლოდან იწყება“,- აცხადებს გოგუაძე.

მისი თქმით, მოთხოვნა დიღმის მასივში მდებარე ბინებზეც შეიმჩნევა, თუმცა ამ ტერიტორიაზე ბინა ნაკლებად ქირავდება. „აგვისტოს ბოლოდან, განსაკუთრებით სექტემბერში, შეიძლება სტუდენტების მხრიდან ბინის ქირაზე მოთხოვნა ერთბაშად გაჩნდეს. ასეთ დროს შეკვეთას ვერ ავუდივართ ხოლმე, იმედია წელსაც ასე იქნება. შარშან მოთხოვნა იყო დიღმის მასივის მიმართ, მაგრამ გასაქირავებელი ბინა ამ ტერიტორიიდან, პრაქტიკულად არ შემოგვსვლია. ყველაზე მეტად კი ბინებს სტუდენტები ტექნიკური უნივერსიტეტის ტერიტორიაზე ითხოვენ. მათ ურჩევნიათ, ბინა სასწავლებლის ახლოს იქირაონ და ტრანსპორტის ხარჯი მაინც დაზოგონ“,- დასძენს ნელი გოგუაძე.

როგორც უკვე აღვნიშნეთ, ლარის გაუფასურების შემდეგ ქონების ღირებულება დაახლოებით 10-15 პროცენტით შემცირდა. „ქართველი მომხმარებელი ძირითადად იპოთეკური სესხის დახმარებით ყიდულობს ქონებას. იგი გაიცემა დოლარში, ანაზღაურება კი მოსახლეობის უმრავლესობას ლარში აქვს. აქედან გამომდინარე, ვისაც სურს ბინის გაყიდვა, უნდა გაუსწოროს ამ რეალობას თვალი და დაწიოს ფასი. ახლა კარგი დროა უძრავი ქონების შესაძენად“,- აცხადებენ მაკლერები.  მათივე ინფორმაციით, მოსახლეობის მოთხოვნა, ტრადიციულად, მშენებარე ბინებზე უფრო მაღალია. ძველ ბინებს კი უმეტესად უცხოელები ითხოვენ, ვისაც ბინის შეძენა ქალაქის ძველ უბანში სურს. მაკლერების ნათქვამს ოფიციალური სტატისტიკაც ადასტურებს. საჯარო რეესტრის ეროვნული სააგენტოს მონაცემებით, საანგარიშო პერიოდში პირველადი უძრავი ქონების ბაზარი , 2014 წლის ივნისთან შედარებით, 15.8%-ით გაიზარდა, ხოლო მეორადი უძრავი ქონების - 5.3%-ით.

მთელი საქართველოს მასშტაბით უძრავი ქონების ბაზარზე 2015 წლის ივნისის თვეში რეგისტრირებული ტრანზაქციების რაოდენობამ 49 138 ერთეული შეადგინა, რაც 2014 წლის ანალოგიურ პერიოდთან შედარებით 7.3 %-ით მეტია და 2015 წლის მაისის თვესთან შედარებით - 17.4%-ით მეტი,- იუწყება საჯარო რეესტრის ეროვნული სააგენტო.

საანგარიშო პერიოდში პირველადი უძრავი ქონების ბაზარი, 2014 წლის ივნისთან შედარებით, 15.8 %-ით გაიზარდა, ხოლო მეორადი უძრავი ქონების -5.3%-ით. პირველადი უძრავი ქონების ბაზარი მაისთან შედარებით 27.7%-ით გაიზარდა, ხოლო მეორადი უძრავი ქონების- 15 %-ით.

კომპანია „სიგმას“ დირექტორი ზურაბ ლაჩაშვილი განმარტავს, რომ ძველმა, საბჭოთა პერიოდში აშენებულმა სახლებმა პოპულარობა დაკარგა და ის მყიდველისთვის უკვე აღარ არის მიმზიდველი, თუმცა მომხმარებლის ასეთი განწყობა გარეუბნებზე არ ვრცელდება.

„სხვადასხვა რეგიონისთვის განსხვავებული ვითარებაა. უძრავ ქონებაზე მეტი მოთხოვნა ჯერჯერობით გარეუბნებშია, სადაც ბინებზე ფასი მეტ-ნაკლებად შენარჩუნდა. ცენტრში უფრო ახალაშენებული ბინები იყიდება. საბჭოთა პერიოდში აშენებული ბინა მომხმარებელს უკვე მორალურადაც აღარ უნდა. ვისაც აქვს, ისიც ცდილობს გაყიდვას და ახალი ბინის შეძენას, ბანკის დახმარებით თუ სხვა საშუალებით. რეალიზაციაზე სხვადასხვა ფაქტორი მოქმედებს, ასეთია თუნდაც ქვეყნის ეკონომიკური მდგომარეობა , ფულად-საკრედიტო პოლიტიკა, ინვესტიციები და სხვა. დღესდღეობით გარეუბნებში მშენებლობა ნაკლებად მიმდინარეობს, ვიდრე დედაქალაქის ცენტრში. ფასზე გავლენა კონკურენციამაც განსაზღვრა. ბოლო დროს ბაზარზე ბევრი კომპანიაა, რომელიც მშენებლობითა და ბინების რეალიზაციითაა დაკავებული. ფაქტობრივად, მოწოდება დიდია, მოთხოვნა - ნაკლები და ამგვარმა დისბალანსმა ფასზეც ადეკვატურად იმოქმედა“, - აცხადებს ლაჩაშვილი.

მარი ჩიტაია

წყარო: გაზეთი "რეზონანსი"