4 მლრდ ევროზე მეტი - უეფა-ს 2025-26 წლების შემოსავალი ცნობილია
უეფა 2025-26 წლების სეზონში, ევროტურნირებიდან შემოსავლის სახით, 4.4 მლრდ ევროს მიიღებს. ამის შესახებ ინფორმაციას გამოცემა Defensa Central-ი ავრცელებს.
წყაროს შეფასებით, ევროპული ფეხბურთის მმართველ ორგანოს აღნიშნული თანხა ჩემპიონთა ლიგის, ევროპა ლიგის, ევროპა კონფერენს ლიგისა და უეფა-ს სუპერ თასისგან მიღებული ჯამური შემოსავალია.
თავის მხრივ, ამ თანხიდან ტურნირების ჩატარებასა და სხვა მათთან დაკავშირებული ხარჯების ოპტიმიზაციას თავად უეფა უზრუნველყოფს:
- ჩემპიონთა ლიგისა და უეფა-ს სუპერ თასის მონაწილე კლუბთა სრული საპრიზო თანხა - 2.437 მლრდ ევრო
- ევროპა ლიგის მონაწილე კლუბთა სრული საპრიზო თანხა - 565 მლნ ევრო
- ევროპა კონფერენს ლიგის მონაწილე კლუბთა სრული საპრიზო თანხა - 285 მლნ ევრო
- ტურნირების ორგანიზაციული და ადმინისტრაციული ხარჯები - 387 მლნ ევრო
- საკვალიფიკაციო ეტაპებზე მონაწილე კლუბებისთვის გადასახდელი - 440 მლნ ევრო
- ქალთა ჩემპიონთა ლიგა - 22 მლნ ევრო
- ახალგაზრდული ლიგა - 3 მლნ ევრო
რაც შეეხება დანარჩენ 618 მლნ ევროს, რაც სრული შემოსავლის 15%-ს შეადგენს, ის უეფა-ს ხაზინაში დარჩება.
აღსანიშნავია, რომ იგივე რჩება, ევროპის მთავარ საკლუბო ტურნირ ჩემპიონთა ლიგის საპრიზო თანხა, რაც გასულ სეზონში იყო.
შეგახსენებთ, რომ 2024-25 წლების სეზონის ჩემპიონთა ლიგის გამარჯვებულმა, ფრანგულმა პსჟ-მ, ტურნირის ჩემპიონობისთვის, ჯამურად 100 მლნ ევროზე მეტი გამოიმუშავა - დაახლოებით ამდენივე შეხვდა ფინალისტ „ინტერსაც“.
ინფორმაციისთვის გეტყვით, რომ ხვიჩა კვარაცხელიას პსჟ ჩემპიონთა ლიგაზე ტიტულის დაცვას დაიწყებს 16 სექტემბრიდან, როცა ტურნირის ახალი სეზონის ფინალური ეტაპის პირველი ტურის მატჩები ჩატარდება.
