ბათუმში გამოფენა "ბათუმის ეზოს ამბები IV" გაიმართება
ორგანიზაცია "Micro-ფონი", 6, 7 და 8 აგვისტოს გამოფენას - "ბათუმის ეზოს ამბები IV" მართავს. აჭარის ტურიზმის და კურორტების დეპარტამენტის ინფორმაციით, გამოფენა ძველ ბათუმში , / ნ. ჟორდანიას ქუჩაზე (მაზნიაშვილისა და ორჯონიკიძის ქუჩებს შორის) გაიმართება.
"პატარა ქალაქის პატარა ეზოების ამბები, რომელიც ბათუმის ისტორიას, კულტურას და ხასიათს ქმნის, დროში და სივრცეში იკარგება. საჯარო ხელოვნების პროექტი - "ბათუმის ეზოს ამბები" კი საშუალებაა ეს ისტორიები თანამედროვე ხელოვნების ენაზე გამოხატოს და სხვადასხვა ფორმით საზოგადოებამდე მიიტანოს. პროექტი მეოთხე წელია იმართება და ის ქალაქის კულტურული ცხოვრების მნიშველოვანი ნაწილი გახდა. ბათუმის ყოველწლიურ უჩვეულო ქუჩის გამოფენაში მსოფლიოს სხვადასხვა ქალაქებში მომუშავე მულტიმედია არტისტები მონაწილეობენ, ისინი თავს ძველი ბათუმის ერთ-ერთ ქუჩაზე იყრიან და "ბათუმის ეზოს ამბებს" ეზოს მცხოვრებლებთან ერთად გვიყვებიან.
ფესტივალში მონაწილე არტისტების ნამუშევრების ინსპირაცია ეზოს მცხოვრებელების საინტერესო პერსონალური ისტორიები, ოჯახებში არსებული ფოტო-მასალები, საყოფაცხოვრებო საგნები, ეზოს ურბანული გარემო ან ყოველდღიური ცხოვრება ხდება, რომელსაც ბათუმელი, თბილისელი და უცხოელი მულტიმედია არტისტები სხვადასხვა გამომსახველობითი ხერხებითა და საშუალებით გვაჩვენებენ. წელს ფესტივალის მონაწილეთა რიცხვი გაიზარდა და "ბათუმის ეზოს ამბებში" 14 არტისტი მონაწილეობს. არტისტები კონკურსის მეშვეობით შეირჩა.
წელს, "ბათუმის ეზოს ამბები" ჟორდანიას ქუჩაზე მდებარე ეზოს მცხოვრებლების საინტერესო ისტორიებს გაგაცნობთ. არტისტებმა მუშაობა უკვე დაიწყეს. ისინი 10 დღის განმავლობაში იმუშავებენ და ჯგუფური ან ინდივიდუალურ ნამუშევრებს შექმნიან. ახალი ისტორიებიდან საინტერესო ნამუშევრები ძველ ბათუმში, ღია ცის ქვეშ 6-დან 8 აგვისტოს ჩათვლით გამოიფინება. "ბათუმის ეზოს ამბები" აჭარის განათლების, კულტურისა და სპორტის სამინისტროს დაფინანასებით უკვე მეოთხე წელია ხორციელდება, მას უკვე ტრადიციული სახე აქვს და ბათუმის არტცხოვრებაში განსაკუთრებული ადგილი უჭირავს.
წლევანდელი "ბათუმის ეზოს ისტორიების" მონაწილეები არიან: პასკუალინა ფრანჩესკა (ფრენსის) ბელზერი, შვეიცარია, კორნელია აუინგერი, ავსტრია, ფერნანდო მანველ დოს სანტოს მესკიტა, პორტუგალია, მაგდალენა სპარსკა, პოლონეთი, იან ჰუდოჟილოვი, ჩეხეთი/შვეიცარია, ალბერტო ალგაიერი, ავსტრია, გიორგი ქათამაძე, ზურა ჩართოლანი, გოჩა ჟღენტი, გიორგი შენგელია/ქეუ მეფარიშვილი, ნატალია ავალიანი, გიორგი მაღრაძე, ქეთა ღვინეფაძე და თამუნა ჩადუნელი", - ნათქვამია ინფორმაციაში.