კუბის ყოფილი პრეზიდენტის, ფიდელ კასტროს განცხადებით, ამერიკამ კუბას მილიონობით დოლარი უნდა გადაუხადოს განხორციელებული მტრული პოლიტიკის სანაცვლოდ.
"კუბას კომპენსაცია ეკუთვნის, რომელიც მიყენებული ზარალის ექვივალენტური უნდა იყოს და ეს მილიონობით დოლარია", - აღნიშნა ფიდელ კასტრომ საავტორო სტატიაში, რომელიც კუბურ "გრანმაში" გამოქვეყნდა. გასულ თვეს აშშ-მა და კუბამ ისტორიულ შეთანხმებას მიაღწიეს ვაშინგტონსა და ჰავანაში საელჩობის გახსნის თაობაზე. მხარეებმა აღნიშნული გადაწყვეტილება მას შემდეგ მიიღეს, რაც ორ ქვეყანას შორის ურთიერთობა გასული წლის დეკემბერში აღდგა.
კუბასა და აშშ-ის შორის დიპლომატიური კავშირები 1961 წლის შემდეგ გაყინული იყო, მაშინ როდესაც ვაშინგტონმა კუბასთან სავაჭრო კავშირები გაწყვიტა და ემბარგო დააწესა. 2014 წლის ბოლოს კი კუბამ და აშშ-მა კავშირების აღდგენა გადაწყვიტეს. აპრილში აშშ-ის პრეზიდენტმა კუბა ტერორიზმის მხარდამჭერი ქვეყნების სიიდან ამოიღო. რამდენიმე თვის წინ კი ობამასა და კუბის ლიდერ რაულ კასტროს შორის ისტორიული შეხვედრაც შედგა.