გელათის მონასტერთან ინფრასტრუქტურული პროექტები ხორციელდება

გელათის მონასტერთან ინფრასტრუქტურული პროექტები მიმდინარეობს. მუნიციპალური განვითარების ფონდის ინფორმაციით, საქართველოს რეგიონული განვითარებისა და ინფრასტრუქტურის სამინისტროს მუნიციპალური განვითარების ფონდი, მსოფლიო ბანკისა და საქართველოს მთავრობის მხარდაჭერით, გელათის მონასტერთან ტურისტული ინფრასტრუქტურის მოწყობისა და გელათის მონასტრის სარესტავრაციო- საკონსერვაციო სამუშაოებს ახორციელებს.

პროექტით გათვალისწინებული სამუშაოების მიმდინარეობას, საქართველოს მუნიციპალური განვითარების ფონდის აღმასრულებელი დირექტორი - ჯუანშერ ბურჭულაძე, ფონდის აღმასრულებელი დირექტორის მოადგილე დავით ტაბიძე და მსოფლიო ბანკის, მდგრადი განვითარების პროგრამების კოორდინატორი სამხრეთ კავკასიაში - აჰმედ აივეიდა გაეცნენ. გელათის სატრაპეზოში, საზედამხედველო კომპანია "ეპტისამ" გამართა პრეზენტაცია, სადაც საუბარი იყო იმერეთის რეგიონში, კულტურული მემკვიდრეობის ძეგლების ინტეგრირებული ინფრასტრუქტურული პროექტების მიმდინარეობასა და სამომავლო გეგმებზე.

მუნიციპალური განვითარების ფონდის ინფორმაციით, პროექტის მიზანია წვლილი შეიტანოს კულტურული მემკვიდრეობის ძეგლების შენარჩუნებაში და ხელი შეუწყოს საქართველოში ტურისტული ინფრასტრუქტურის განვითარებას. პროექტის ძირითადი ბენეფიციარები არიან ადგილობრივი მოსახლეობა, რომელთაც ტურიზმის განვითარების შედეგად გაუუმჯობესდებათ სოციალურ-მატერიალური მდგომარეობა და რეგიონში ჩასულ ტურისტებს შესაძლებლობა ექნებათ გაუმჯობესებულ პირობებში გაეცნონ იმერეთში კულტურული მემკვიდრეობის ძეგლებს და ისარგებლონ ძეგლების მიმდებარედ გამართული ინფრასტრუქტურით.

გელათის მონასტერთან ტურისტული ინფრასტრუქტურის მოწყობა ითვალისწინებს: საინფორმაციო ცენტრის, საპირფარეშოების, კაფეტერიის, ავტოსადგომის, ტაძართან მისასვლელი 600 მეტრიანი გზის, წყლისა და კანალიზაციის ქსელის გამართვას. პროექტს ,,სამშენებლო კომპანია #1" ახორციელებს.  სარესტავრაციო-საკონსერვაციო სამუშაოების ფარგლებში გათვალისწინებულია გუმბათის და ქვების რესტავრაცია. ამ დროისთვის დასრულებულია სამობილიზაციო პერიოდი და უკვე მიმდინარეობს ფასადებზე ქვების საკონსერვაციო სამუშაოები. პროექტს ახორციელებს შპს ,,ხელოვნების საერთაშორისო ცენტრი". მონასტრის სარეაბილიტაციო-საკონსერვაციო და გელათის მიმდებარედ ტურისტული ინფრასტრუქტურის მოწყობის სამუშაოების საერთო ღირებულებამ 2 500 000 ლარი შეადგინა.