1164 დევნილ ოჯახს საცხოვრებელი ფართი საკუთრებაში სიმბოლურ ფასად, ერთ ლარად გადაეცემა. აღნიშნული საკითხი მთავრობის დღევანდელ სხდომაზე განსახილველად ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრ სოზარ სუბარსა და ვიცე-პრემიერს, ეკონომიკის მინისტრს გიორგი კვირიკაშვილს აქვთ.
როგორც მთავრობის სხდომაზე პრემიერ-მინისტრმა ირაკლი ღარიბაშვილმა განაცხადა, მათ ერთობლივად იმუშავეს ამ საკითხზე. ღარიბაშვილის თქმით, 10 000-მდე დევნილ ოჯახს დაუკანონდება საცხოვრებელი ფართი იმ პროცესის ფარგლებში, რომელიც გასული წლის ნოემბერში დაიწყო. სულ 2012 წლიდან კი, პრემიერის ინფორმაციით, საკუთრებაში საცხოვრებელი ფართი გადაეცა 5 120 დევნილ ოჯახს. ირაკლი ღარიბაშვილი აცხადებს, რომ დევნილებისთვის საცხოვრებელი ფართების დაკანონების პროცესი მომავალშიც გაგრძელდება.