ინდური კომპანიები საქართველოში ინვესტირებას გეგმავენ

საქართველოში ინდური ინვესტიციები განხორციელდება, - ამის შესახებ მთავრობის ადმინისტრაციაში განაცხადეს.

საქართველოს მთავრობის ადმინისტრაციის ინფორმაციით, მსხვილი ინდური კომპანიები – Unique Mercantile India და Apna Punjab Resorts  საქართველოში ინვესტირებას გეგმავენ. პოტენციურ ინვესტორებს დღეს საქართველოს პრემიერ-მინისტრი ირაკლი ღარიბაშვილი შეხვდა. მათივე ცნობით, კომპანიების ხელმძღვანელები დაინტერესებულნი არიან თბილისში, წყალტუბოში, ბათუმსა და მესტიაში ოთხ და ხუთვარსკვლავიანი სასტუმროების ქსელის, პროფესიონალური გოლფის მოედნის მშენებლობა-ოპერირებით, ასევე ქუთაისის მეტალურგიული ქარხნის შეძენით.

პრემიერ-მინისტრი საქართველოში ინდური ინვესტიციის განხორციელებას მიესალმება და იმედოვნებს, რომ პროექტები წარმატებით განხორციელდება.  შეხვედრისას საუბარი ასევე შეეხო საქართველოში არსებულ ხელსაყრელ საინვესტიციო გარემოს და ქვეყნის მზარდ ტურისტულ პოტენციალს. მთავრობის მეთაურმა აღნიშნა, რომ საქართველო, ბიზნესგარემოს კუთხით, მსოფლიოს გავლენიან რეიტინგებში მოწინავე პოზიციებზეა.  "მსხვილი ინდური კომპანიები ინდოეთში, სინგაპურში, მალაიზიასა და ინდონეზიაში რამდენიმე ათეულ სასტუმროს ფლობენ, ასევე დაკავებულნი არიან ტურისტების გადაყვანით. ინდური კომპანიების ხელმძღვანელები ტურიზმის სექტორში ერთობლივი საინვესტიციო პროექტების განხორციელებისა და საინვესტიციო ლოკაციების შერჩევის მიზნით, საქართველოში უკვე მეორედ იმყოფებიან. მათთან ეროვნული საინვესტიციო სააგენტო თანამშრომლობს", - ნათქვამია განცხადებაში.