რეგიონული განვითარებისა და ინფრასტრუქტურის მინისტრის მოადგილემ, თენგიზ შერგელაშვილმა, ყვარელსა და ლაგოდეხში სტიქიის შედეგების სალიკვიდაციო სამუშაოები დაათვალიერა.
უწყების ცნობით, აღნიშნულ მუნიციპალიტეტებში 21 აგვისტოს მოსული სეტყვის შედეგად დაზიანებული სახლების სახურავების აღდგენა - რეაბილიტაციის სამუშაოები მიმდინარეობს. "გადახურვის სამუშაოები ადგილობრივი თვითმმართველობების კოორდინაციით ტარდება. რეგიონული განვითარებისა და ინფრასტრუქტურის სამინისტრო რეგულარულად განახორციელებს მონიტორინგს, რათა დროულად აღმოიფხვრას სამუშაო პროცესში წარმოშობილი შესაძლო ხარვეზები", - განმარტავენ სამინისტროში.
მათივე ინფორმაციით, სტიქიის შედეგად სულ 1335 სახლის სახურავი დაზიანდა. აქედან, დაახლოებით 600-600 სახლის სახურავია დაზიანებული ყვარლისა და ლაგოდეხის მუნიციპალიტეტში, ხოლო 135 ახმეტის მუნიციპალიტეტში. "სამუშაოები უწყვეტ რეჟიმში მიმდინარეობს, რათა შემოდგომა-ზამთრის სეზონს კეხეთის რეგიონის მოსახლეობა გადახურულ სახლებში შეხვდეს", - განმარტავენ უწყებაში.