"ბანკებმა რესტრუქტურიზაციის სანაცვლოდ, მოსახლეობას არ უნდა დააკისრონ გაზრდილი პროცენტი და საურავები"

ეროვნული ბანკის პრეზიდენტის, გიორგი ქადაგიძის განცხადებით, მნიშვნელოვანია, მთავრობამ, განსაკუთრებით ეკონომიკური ბლოკის მინისტრებმა დააფიქსირონ თავისი პოზიცია რეფინანსირების ინსტრუმენტთან და მთლიანად მონეტარულ პოლიტიკასთან დაკავშირებით.

როგორც გიორგი ქადაგიძემ ჟურნალისტებს განუცხადა, დღეს არის შემდეგი ვითარება, ის მილიარდი დოლარი, რომელიც დააკლდა ჩვენს ეკონომიკას, ბოლო წლის განმავლობაში, ამ მილიარდი დოლარის შემოდინების დანაკლისმა გამოიწვია კურსის გაუფასურება. "შესაბამისად გაუფასურებულმა კურსმა შეამცირა იმპორტი იგივე ოდენობით და დღეს ჩვენ შეგვიძლია ვთქვათ, რომ საგადამხდელო ბალანსიდან ანუ შემოდინებების ნაწილი ასახული არის იმპორტის შემცირებაში. შესაბამისად, აქ ამ მიმართულებით ჩვენ კურსზე ზეწოლას არ ველოდებით. ცალსახად მინდა ხაზი გავუსვა, ამას აქვს სხვა უარყოფითი ფაქტორები, თუმცა კურსთან მიმართებაში შეგვიძლია ვთქვათ, რომ ფუნდამენტური ფაქტორები არის აღმოფხვრილი. რას ნიშნავს ეს რიგითი ადამიანის დონეზე. ჩვენ მზად ვართ, დღეს უკვე უფრო აგრესიული, მონეტარული პოლიტიკის გასატარებლად სხვადასხვა მიმართულებით, თუ ამის საჭიროება დადგება. თუმცა იმისთვის, რომ ბაზრის მონაწილეებს ჰქონდეთ ნდობა ჩვენი ინსტრუმენტების მიმართ, რაც არის აუცილებელი წინაპირობა, რომ მივაღწიოთ წარმატებას, ძალიან მნიშვნელოვანია, მთავრობამ, განსაკუთრებით ეკონომიკური ბლოკის მინისტრებმა, დააფიქსირონ თავისი პოზიცია რეფინანსირების ინსტრუმენტთან და მთლიანად მონეტარულ პოლიტიკასთან დაკავშირებით, რომ ერთხელ და საბოლოოდ წერტილი დავუსვათ ამ საკითხს. როგორც კი ამ საკითხს დავუსვამთ წერტილს, ჩვენ შეგვეძლება უფრო პროაქტიური ქმედებები განვახორციელოთ. არაფერი არ არის გასაკვირი და უცნაური იმაში, რომ მოსახლეობის ნაწილს გაურთულდა სესხების მომსახურება, განსაკუთრებით მათ, ვისაც დოლარში ჰქონდა სესხი გაეზარდათ სესხის მომსახურების ტვირთი. შესაბამისად, ვისთვისაც ეს მნიშვნელოვან პრობლემად იქცა, მათ უნდა მიაკითხონ კომერციულ ბანკებს და მოსთხოვონ მათ რესტრუქტურიზაცია საკუთარი საკრედიტო ხელშეკრულებების. ხოლო მეორე მხრივ, ბანკებმა უნდა გამოიჩინონ მაქსიმალური მოქნილობა და არავითარ შემთხვევაში არ უნდა დააკისრონ არც გაზრდილი პროცენტი, არც არანაირი დამატებითი საურავები რესტრუქტურიზაციის სანაცვლოდ. მითუმეტეს, მიუღებელია მუქარა ე.წ. შავ სიაში მოხვედრით და ა. შ.", - განაცხადა გიორგი ქადაგიძემ.

როგორც ეროვნული ბანკის პრეზიდენტმა აღნიშნა, დღეს ძალიან მნიშვნელოვანია საბანკო სექტორმა გამოიჩინოს მაქსიმალური მოქნილობა და სოციალური პასუხისმგებლობა. ქადაგიძის განცხადებით, ამ პროცესებს ეროვნული ბანკი ძალიან დეტალურად გააკონტროლებს და პროცესის მონიტორინგს განახორციელებს.