დიმიტრი ქუმსიშვილი: ვიმედოვნებთ, რომ ჩინეთის ბაზარი საქართველოსთვის სრულად გაიხსნება

"ვიმედოვნებთ, რომ საბოლოო მოლაპარაკებების შედეგად, ჩინეთის ბაზარი საქართველოსთვის სრულად გაიხსნება", - ამის შესახებ საქართველოს ეკონომიკისა და მდგრადი განვითარების მინისტრმა, დიმიტრი ქუმსიშვილმა საქართველოსა და ჩინეთს შორის თავისუფალი ვაჭრობის შესახებ მოლაპარაკებების დაწყების საკითხის კომენტირებისას განაცხადა.

აღნიშნული გადაწყვეტილება საქართველოს პრემიერ-მინისტრ, ირაკლი ღარიბაშვილისა და ჩინეთის პრემიერ-მინისტრ, ლი კეციანის შეხვედრაზე მიიღეს. შეხვედრას ვიცე პრემიერი, საგარეო საქმეთა მინისტრი გიორგი კვირიკაშვილი და ეკონომიკისა და მდგრადი განვითარების მინისტრი, დიმიტრი ქუმსიშვილი ესწრებოდნენ. ,,პრემიერ-მინისტრებმა შეხვედრაზე განიხილეს აღნიშნული ინიციატივა და შეთანხმდნენ, რომ სამუშაო ჯგუფები თავისუფალი ვაჭრობის შესახებ მოლაპარაკებებს დაიწყებენ. თავის მხრივ, უკვე დასრულებულია შესაძლებლობების შესწავლა, რომელმაც შესაძლო მოლაპარაკების დადებითი მხარეები აჩვენა. ჩვენის მხრივ, ველოდებით საექსპორტო პოტენციალის გაზრდას ჩინეთის მიმართულებით. ძირითადი საქონელი, რომლის გატანასაც ჩინეთში ვაპირებთ, არის ღვინო. დღესდღეობით საკმაოდ მაღალია ღვინოზე დამატებითი მოსაკრებელი, რომელიც ჩინეთის სახალხო რესპუბლიკას გააჩნია და ჩვენ ვიმედოვნებთ, რომ საბოლოო მოლაპარაკებების შედეგად, ჩინეთის ბაზარი საქართველოსთვის სრულად გაიხსნება", - განაცხადა ქუმსიშვილმა.

საქართველოს ეკონომიკის სამინისტროს ინფორმაციით, შეხვედრაზე ხაზი გაესვა ბოლო პერიოდში საქართველოსა და ჩინეთს შორის თანამშრომლობის გააქტიურებას, აღინიშნა ორმხრივი სავაჭრო-ეკონომიკური თანამშრომლობის განვითარების მნიშვნელობა. მხარეებმა ასევე ისაუბრეს ისტორიული აბრეშუმის გზის აღდგენის ინიციატივაზე. საუბარი შეეხო "თბილისის აბრეშუმის გზის ფორუმის" მნიშვნელობას, რომელიც პრემიერ-მინისტრ ირაკლი ღარიბაშვილის ინიციატივით დაარსდა. შეხვედრაზე ასევე ითქვა, რომ იზრდება ჩინური კომპანიების მხრიდან საქართველოთი დაინტერესება.