ყურძნის რეალიზაციის ხელშეწყობის მიზნით, საქართველოს ყველა რეგიონში ყურძნის სარეალიზაციოდ სპეციალური ადგილები მოეწყო.
აღნიშნულთან დაკავშირებით ინფორმაციას სოფლის მეურნეობის სამინისტრო ავრცელებს. უწყების განმარტებით, ყურძნის სარეალიზაციო ადგილებია მოწყობილი: ქუთაისში (ბალახვანის ასსართულიან კიბესთან და ტორპედის სტადიონის მიმდებარე ტერიტორია); რუსთავში (მე-12 მ/რ, სტამბოლის ბაზრის მიმდებარე ტერიტორია); ზუგდიდში (კედიას ქუჩა, ბაზრის უკანა მხარე); ამბროლაურში (გამსახურდიას 2, ბაზრის ტერიტორია); ოზურგეთში (ავტოსადგურის მიმდებარე ტერიტორია, საბთუმო ბაზრობა); გორსა (მოსკოვის ქ. #1) და ბათუმში (მაიაკოვსკის ქ#4, აღმაშენებლის ქ. ,,ხოფას ბაზარი", გმირთა ხეივანი აბუსელიძის ქუჩის კვეთაზე);
"თვითმმართველ ქალაქებში არსებულ აგრარულ ბაზრებში რქაწითელის ჯიშის ყურძნის სარეალიზაციო ფასი 1.00 ლარიდან - 2.50 ლარამდე მერყეობს", - აცხადებენ სამინისტროში. რთველი 2015-ის ფარგლებში ყურძნის კრეფა 10 სექტემბრიდან დაიწყო. დღეის მონაცემებით ღვინის საწარმოების მიერ უკვე გადამუშავებულია 4400 ტონა ყურძენი.