ლუკ დევინი: DCFTA-სგან სრული სარგებლის მისაღებად, საქართველოს ჯერ კიდევ ბევრი რეფორმა აქვს გასატარებელი
საქართველოს მთავრობას ჯერ კიდევ ბევრი რეფორმა და რეგულაცია აქვს გასატარებელი, რათა ევროკავშირთან ღრმა და ყოვლისმომცველი თავისუფალი სავაჭრო სივრცის შეთანხმებისგან სრული სარგებელი მიიღოს, - ამის შესახებ ევროკავშირის ვაჭრობის დირექტორატის ვაჭრობის განყოფილების ხელმძღვანელმა ლუკ დევინმა განაცხადა, რომელიც დღეს სასტუმრო "ქორთიარდ მარიოტში" საერთაშორისო კონფერენციას "ეროვნული პლატფორმების შესაძლებლობების გაძლიერების რეგიონული ღონისძიება" დაესწრო.
"ინტერპრესნიუსთან" საუბარში მან დაასახელა ის ორი ძირითადი გამოწვევა, რომელიც საქართველოსა და ევროკავშირს DCFTA-ს იმპლემენტაციის პროცესში არსებობს. "ასოცირების ხელშეკრულების ამ ნაწილის - ღრმა და ყოვლისმომცველი თავისუფალი სავაჭრო სივრცის შესახებ შეთანხმების ამოქმედებიდან ერთი წლის შემდეგ უამრავი პოზიტიური ცვლილება გვაქვს. რაც შეეხება გამოწვევებს, მე ორ თემას გამოვყოფდი. პირველი ის, რომ საქართველოს ჯერ კიდევ მრავალი რეფორმა და რეგულაცია აქვს გასატარებელი, რათა სრულად მიიღოს სარგებელი ასოცირების შეთანხმებისგან, განსაკუთრებით საკვების უსაფრთხოების კუთხით. რეფორმების გატარება საჭიროა ევროკავშირის სტანდარტების დასაკმაყოფილებლად, რათა საქართველომ მეტი პროდუქციის გატანა მეტ რეგიონში შეძლოს. მეორე გამოწვევაა კომუნიკაციის პრობლემა. შეთანხმების პოტენციალი ძალიან დიდია, იგი თავისი არსით ყოველმხრივია, ეკონომიკური ცხოვრების უამრავ ასპექტს ეხება, მაგრამ ის კარგად უნდა იყოს შესწავლილი და მოსახლეობას ჰქონდეს ინფორმაცია იმისთვის, რომ ხალხმა სარგებელი მიიღოს", - განაცხადა ლუკ დევინმა და დასძინა, რომ მოსახლეობის ინფორმირებულობის გაზრდაზე არამხოლოდ მთავრობამ, არამედ სამოქალაქო საზოგადოებამაც უნდა იზრუნოს.