პეკინის გამზირზე, ახლად გარემონტებულ მიწისქვეშა გადასასვლელში წყალი ჩადის
თბილისში, პეკინის გამზირზე ახლად გარემონტებულ მიწისქვეშა გადასასვლელში წყალი ჩადის. მეტრო "ტექნიკური უნივერსიტეტის" ამოსასვლელში მყოფი მოვაჭრეები ყვებიან, რომ ტერიტორია ცოტა ხნის წინ მერიამ გაარემონტა - შეიღება ჭერი, დაიგო ფილები, თუმცა ახალგარემონტებულ მიწისქვეშა გადასასვლელში წყალი მუდმივად ჩადის, წვიმის დროს კი ჭერსა და კედლებზე წყლის დინება განსაკუთრებით ძლიერდება. "როგორც გარეთ წვიმს, აქაც ისევე წვიმს. რემონტი გაკეთდა, მაგრამ წყალი მაინც ჩამოგვდის. რა ჯანდაბად მინდოდა ფილები, წყალში ვზივართ. პოლიეთილენის პარკებს ვაფენთ, რომ ტანსაცმელი დავკიდოთ", - აღნიშნა ერთ-ერთმა მოვაჭრემ, თინათინ დოლიძემ.
აღნიშნული ტერიტორია "ინტერპრესნიუსმა" გასულ თვეში დაათვალიერა. ამ პრობლემაზე მოვაჭრეები მაშინაც საუბრობდნენ და მერიას დახმარებას თხოვდნენ. უწყებაში კი აცხადებდნენ, რომ წყლის დინების პრობლემა მოგვარდებოდა.