დავით ნარმანიას განცხადებით, ანძაზე სანათების გამოცვლა აუცილებლობას წარმოადგენდა

თბილისის მერის დავით ნარმანიას განცხადებით, ანძაზე სანათების გამოცვლა აუცილებლობას წარმოადგენდა. როგორც ნარმანიამ ჟურნალისტებს განუცხადა, ძველი და უხარისხო სანათების დიდი ნაწილი, რომელიც "ნაციონალური მოძრაობის" მმართველობის დროს დამონტაჟდა, მწყობრიდან იყო გამოსული. "ანძის დემონტაჟის სამუშაოები ჩვენ უკვე დავიწყეთ. ძველი უხარისხო სანათების დიდი ნაწილი, რაც "ნაციონალური მოძრაობის" მმართველობის დროს დამონტაჟდა, ერთი მხრივ, მწყობრიდან არის გამოსული, მეორე მხრივ, ტექნოლოგიურად საკმაოდ რთული იყო ის, რაც მათ დროს გაკეთდა. ამის დემონტაჟი იყო აუცილებელი. ჩვენ ჩავატარეთ კონკურსი და კონკურსის საფუძველზე საუკეთესო წინადადება შევარჩიეთ, ფასით ყველაზე მისაღები და ხარისხით ყველაზე საუკეთესო წინადადება, რაც დროში მოსწრებადი იყო. ყველაფერს ვაკეთებთ წესების სრული დაცვით იმისთვის, რომ ახალ წელს განახლებული და უფრო კარგად განათებული ანძით შეხვდეს ჩვენი დედაქალაქი და ეს საჩუქარი გავუკეთოთ თითოეულ ჩვენს თანამოქალაქეს", - განაცხადა დავით ნარმანიამ. "ნაციონალური მოძრაობის" კრიტიკას იმის თაობაზე, რომ არსებული მძიმე სოციალური ვითარების ფონზე მსგავსი ხარჯების გაწევა გაუმართლებელია, ნარმანია კონტრკითხვით პასუხობს – სოციალური პრობლემები მათ დროს არ იყო?

თბილისის ანძაზე განათების შეცვლისთვის დედაქალაქის ბიუჯეტიდან 1 900 000 ლარია გამოყოფილი. როგორც "ინტერპრესნიუსთან" საუბარში შპს "სინათლის ქალაქის" დირექტორმა, ვასილ ხორავამ განაცხადა, 635 000 ევრო ჯდება იტალიური კომპანიის მომსახურება, რომელიც სამუშაოებს აწარმოებს, ხოლო 200 000 ლარი კაბელირებასა და სადემონტაჟო სამუშაოებს მოხმარდება.