დავით უსუფაშვილი: საქართველო არის ხიდი მსოფლიოს განვითარებული და განვითარებადი ქვეყნების ეკონომიკებს შორის
პარლამენტის თავმჯდომარე დავით უსუფაშვილი სამუშაო ვიზიტით ჩინეთის სახალხო რესპუბლიკაში იმყოფება, სადაც აზიური პოლიტიკური პარტიების აბრეშუმის გზის თემატურ კონფერენციას დაესწრო და მონაწილეებს სიტყვით მიმართა. პარლამენტის პრესსამსახურის ინფორმაციით, სიტყვით გამოსვლისას საქართველოს პარლამენტის თავმჯდომარემ ჩინეთის სახალხო რესპუბლიკის პრეზიდენტის სი ცზინპინის ინიციატივაში – "ერთი სარტყელი - ერთი გზა" (OBOR) - საქართველოს როლსა და მნიშვნელობაზე ისაუბრა. მისი განცხადებით, საქართველო ისტორიულად იყო ბუნებრივი ხიდი, რომელიც ევროპას, ცენტრალურ აზიას, რუსეთსა და ახლო აღმოსავლეთს ერთმანეთთან აკავშირებდა, ხოლო აბრეშუმის გზის აღორძინებითა და აზიასთან ურთიერთობის აღდგენით, ქვეყანა ევროპაში თავის ადგილს დაიბრუნებს. "აბრეშუმის გზის აღორძინების გზით, აზიასთან ურთიერთობის აღდგენით საქართველო დაიბრუნებს თავის ადგილს ევროპაში. ჩვენ ახლა ახალი სავაჭრო მარშრუტის ცენტრში ვართ, ჩვენ ვართ ხიდი მსოფლიოს განვითარებული და განვითარებადი ქვეყნების ეკონომიკებს შორის", - განაცხადა დავით უსუფაშვილმა.
მისივე თქმით, ევროპიდან ჩინეთში სახმელეთო კავშირს კომერციული მნიშვნელობა აქვს. "მადრიდამდე მიღწევას 21 დღე სჭირდება, ვარშავამდე - 16 დღე და 9 დღე - თბილისამდე, საქართველოს დედაქალაქამდე. ის, რაც ახლა ჩვენ გვაქვს, ესაა დინამიური გაანგარიშება სიჩქარისა ღირებულების წინააღმდეგ. მაგრამ ღირებულება მცირდება მასშტაბით, ხოლო მანძილი - თითოეული გვირაბით, გამშვები პუნქტის თითოეული ოპტიმიზაციით და ჩვენს მიერ ჩადებული თითოეული ინვესტიციით", - განაცხადა დავით უსუფაშვილმა. მისივე შეფასებით, ეს პროექტი საქართველოს გეოპოლიტიკურ და გეოეკონომიკურ აღქმას შეცვლის.
საქართველოს მნიშვნელობასა და როლზე საუბრისას, პარლამენტის თავმჯდომარემ კონფერენციის მონაწილეებს შეახსენა, რომ მსოფლიო ბანკის თანახმად, საქართველო ბიზნესის კეთების სიმარტივის ინდექსით მსოფლიოში მე-15 ქვეყანაა, ხოლო "ბიზნესის დაწყების სიმარტივის ინდექსით" - მსოფლიოში მეხუთე ქვეყანა. მისივე თქმით, ფსკერიდან პროგრესის დაწყებაზე რთული ამ პოზიციების შენარჩუნებაა, რისთვისაც ქვეყანა ყოველწლიურად მუშაობს და ცდილობს, არსებული შედეგები გააუმჯობესოს. "ჩინეთს საქართველოში ბიზნესის კეთების სიმარტივის კუთხით პირადი გამოცდილება გააჩნია. 2014 წლის შემდეგ, ჩინეთი არის პირდაპირი უცხოური ინვესტიციების მიხედვით ერთ-ერთი ლიდერი ჩვენს ქვეყანაში და სიდიდით მესამე სავაჭრო პარტნიორი. საქართველოს მომგებიანი ბიზნეს კლიმატი არის რეალობა, რომლითაც ისევე ინტერესდება ევროპა, როგორც ჩინეთი. 2014 წელს, პირდაპირი უცხოური ინვესტიციები საქართველოში 35 პროცენტით გაიზარდა (წლიდან-წლამდე). ეს იყო ყველაზე დიდი ტალღა 6 წლის განმავლობაში. ამ ნაკადის 64 პროცენტი სწორედ ევროკავშირიდან შემოვიდა", - აღნიშნა სიტყვით გამოსვლისას დავით უსუფაშვილმა.
პარლამენტის თავმჯდომარის განცხადებით, ქვეყანაში სტაბილური მაკროეკონომიკური გარემოა, კორუფცია კი დაბალი, რაც საერთაშორისო გამჭვირვალობის რეიტინგში, საქართველოს 130-ე ადგილიდან 50-ე ადგილზე გადმონაცვლებითაც დასტურდება. ქვეყნის უპირატესობებზე და მიღწევებზე საუბრისას, დავით უსუფაშვილმა ასევე აღნიშნა, რომ საქართველო ინვესტორებს ბაზარზე თავისუფალ დაშვებას სთავაზობს და დამსწრეთ შეახსენა, რომ ქვეყანამ ევროკავშირთან ასოცირების და ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ ხელშეკრულებებს მოაწერა ხელი. პარლამენტის თავმჯდომარემ საქართველოს გეოგრაფიულ მდებარეობას კიდევ ერთხელ გაუსვა ხაზი. "ჩვენ გვაქვს უნიკალური ადგილმდებარეობა. ევროპისა და აზიის გზაჯვარედინზე, საქართველო ისტორიულად იყო სავაჭრო და კულტურული საქმიანობის ჰაბი, რომელიც ორ კონტინენტს ერთმანეთთან აკავშირებდა. ამიტომ, ვფიქრობთ, რომ ჩვენი ქვეყანა, თავისი უნიკალური ისტორიული გამოცდილებით, მდიდარი სოციალური და კულტურული ღირებულებებით და განსაკუთრებული სტრატეგიული მდებარეობით ამ პროექტისთვის ბუნებრივი კანდიდატია", - განაცხადა დავით უსუფაშვილმა.
სიტყვით გამოსვლისას საქართველოს პარლამენტის თავმჯდომარემ აბრეშუმის გზის ფორუმზეც ისაუბრა, რომელიც მიმდინარე წლის 15-16 ოქტომბერს თბილისში გაიმართება. მისი შეფასებით, ფორუმი რეგიონული თანამშრომლობისთვის ახალ შესაძლებლობებს გახსნის. "ახლა, როდესაც ჩვენ ვსაუბრობთ, 300 ჩინელი ბიზნეს ლიდერი, ისევე როგორც მრავალი მაღალი რანგის თანამდებობის პირი, ბიზნესის წარმომადგენლები, ეკონომისტები და პოლიტიკოსები მთელი მსოფლიოს მასშტაბით, ჩემი ქვეყნის დედაქალაქში იკრიბებიან, რომ დაესწრონ თბილისის აბრეშუმის გზის ფორუმს. საქართველოს პრემიერ-მინისტრის, ირაკლი ღარიბაშვილის წამოწყებით, ჩინეთის სახალხო რესპუბლიკის თანაორგანიზებითა და აზიის განვითარების ბანკის მხარდაჭერით, ყოველწლიური მაღალი დონის შეხვედრა რეგიონული თანამშრომლობისთვის ახალ შესაძლებლობებს შეისწავლის ტრანსპორტის, ენერგეტიკის, ტრანსსასაზღვრო ვაჭრობის და ინფრასტრუქტურული განვითარების სფეროებში. ფორუმი საშუალებას მისცემს მონაწილეებს, მოახდინონ ურთიერთსასარგებლო პროექტებისა და ინიციატივების იდენტიფიცირება, რაც შეავსებს აბრეშუმის გზის აღდგენის საბოლოო მისიას", - განაცხადა დავით უსუფაშვილმა.