რუსული კომპანია Vimpelcom საქართველოში კუთვნილი ანძების გაყიდვას არ გამორიცხავს.
„ბლუმბერგის“ ინფორმაციით, კომპანია ანძების გაყიდვას რუსეთში, სომხეთში, ყირგიზეთში, უკრაინასა და უზბეკეთშიც გეგმავს. გაყიდვების საკითხზე Vimpelcom კონსულტაციებს UBS-ისა და Merrill Lynch-ის ბანკებთან, ასევე კომპანია TAP Advisors-თან გადის. ეს უკანასკნელი შესაძლოა, ინვესტორიც გახდეს.
რუსეთში, Vimpelcom-ის მფლობელობაში არსებული ანძების ღირებულება დაახლოებით 5 მილიარდ აშშ დოლარს შეადგენს. ვრცელდებოდა ინფორმაცია, რომ კომპანია რუსეთში 10-11 ათასი ანძის გაყიდვას გეგმავს. Vimpelcom-ში კომენტარისგან ჯერჯერობით თავს იკავებენ.
Vimpelcom სატელეკომუნიკაციო მომსახურების გლობალური პროვაიდერია, რომელიც „ბილაინს“, „კიევსტარს“ და რამდენიმე ათეულ კომპანიას აერთიანებს მსოფლიოს მასშტაბით.