სასამართლო გადაწყვეტილების გარეშე, პოლიციას გამოსახლების უფლება მხოლოდ თვითნებური შეჭრის შემთხვევებში ექნება
იურიდიულ საკითხთა კომიტეტის საკანონმდებლო პაკეტი, რომელიც ე.წ. საპოლიციო გამოსახლების გაუქმებას ითვალისწინებს, პარლამენტმა დღეს მეორე მოსმენით – მუხლობრივად განიხილა.
როგორც პლენარულ სხდომაზე დეპუტატმა პაატა კიკნაველიძემ განმარტა, ინიცირებულ პროექტში შეიცვალა ის, რომ თუკი პირი სხვის საკუთრებაში თვითნებურად არის შეჭრილი და ფაქტი დადგენილია, ასეთ შემხვევაში პოლიციას ექნება უფლება, გამოსახლება სასამართლო გადაწყვეტილების გარეშე განახორციელოს. ყველა სხვა შემთხვევაში გამოსახლებას სასამართლოს გადაწყვეტილება დასჭირდება. საპოლიციო გამოსახლების გაუქმების თაობაზე ცვლილებები "სამოქალაქო კოდექსში" და სხვა თანმდევ კანონებში შედის. კოდექსიდან იმ ნორმის ამოღება ხდება, რომელიც სამართალდამცავი ორგანოს მიერ უძრავ ნივთზე ხელშეშლის აღკვეთას სასამართლოს გადაწყვეტილების გარეშე ითვალისწინებს.
იურიდიულ საკითხთა კომიტეტის პროექტი ინიცირებისთანვე გახდა არასამთავრობო სექტორის წარმომადგენლების და ფინანსური ორგანიზაციების კრიტიკის საგანი. მათი შეფასებით, პროექტის მიღების შემთხვევაში საკუთრების უფლების დაცვის სტანდარტები გაუარესდება.