აგარა-ყორნისი-ცხინვალის გზის რეაბილიტაცია ვადაზე ადრე დასრულდება

საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ინფორმაციით, აგარა-ყორნისი-ცხინვალის საავტომობილო გზის 12 კილომეტრიანი მონაკვეთის სარეაბილიტაციო სამუშაოები დასასრულს უახლოვდება.

გზების დეპარტამენტის ცნობით, აგარა-ყორნისი-ცხინვალის საავტომობილო გზას 40 წელია რეაბილიტაცია არ ჩატარებია. "ოდესღაც არსებული ასფალტის საფარისაგან თითქმის არაფერი იყო დარჩენილი. მოსახლეობა ამორტიზებული გზის ნაცვლად, მინდვრების გავლით გადაადგილდებოდა. პროექტის ფარგლებში დაიგო ასფალტ-ბეტონის საფარი; მოეწყო გზის საყრდენი კედლები და გვერდულები. ამჟამად მიმდინარეობს აღნიშნულ გზაზე არსებული ხიდის რეაბილიტაცია, ასევე, ბეტონის კიუვეტებისა და საზოგადოებრივი ტრანსპორტის გაჩერებების მოწყობის სამუშაოები",-აცხადებენ საავტომობილო გზების დეპარტამენტში.

აღნიშნული გზა ერთმანეთთან 5 სოფელს აკავშირებს და ეგრეთ წოდებულ სამხრეთ ოსეთის პირობით ადმინისტრაციულ საზღვრამდე მიდის. გზის სარეაბილიტაციო სამუშაოების დასრულება კონტრაქტით განსაზღვრულ ვადაზე ადრე - 2016 წლის ნაცვლად, მიმდინარე წლის ბოლოსთვის არის დაგეგმილი. გზების დეპარტამენტის ინფორმაციით, პროექტის ღირებულება 5 მილიონ 194 ათას ლარს შეადგენს და მსოფლიო ბანკის კრედიტის ფარგლებში ხორციელდება. სამუშაოებზე 90 ადამიანი დასაქმდა.