სოფელ ველში აგრომეტეოროლოგიური სადგური დამონტაჟდა
გარემოს ეროვნული სააგენტოს უფროსი და სოფლის მეურნეობის მინისტრის მოადგილე ქვემო ქართლის რეგიონს ესტუმრნენ, სადაც ახლად დამონტაჟებული აგრომეტეოროლოგიური სადგურის სამუშაო პროცესს ადგილზე გაეცნენ.
გარემოს ეროვნული სააგენტოს ინფორმაციით, სააგენტოს მიერ, გარდაბნის მუნიციპალიტეტში, კერძოდ, სოფელ ველში, რომელიც საირიგაციო ზონას წარმოადგენს, აგრომეტეოროლოგიური სადგური დამონტაჟდა. ავტომატური სადგური ჰაერის ტემპერატურასა და ტენიანობაზე, ნალექების რაოდენობაზე, ქარის სიჩქარესა და მიმართულებაზე, ნიადაგის ტემპერატურასა და ტენიანობაზე მონაცემებს გარემოს ეროვნული სააგენტოს ინფორმაციის დამუშავების ცენტრს მიაწვდის, რაც სააგენტოს ცნობით, ადგილობრივ ფერმერებს საშუალებას მისცემს დროულად მიიღონ ინფორმაცია მიმდინარე და მოსალოდნელი მეტეოროლოგიური პროცესების შესახებ. მიღებული ინფორმაცით, ფერმერები სასოფლო-სამეურნეო კულტურების რწყვის ნორმებისა და ვადების შესახებ რეკომენდაციებს დროულად მიიღებენ.
გარემოს ეროვნული სააგენტოს ინფორმაციით, მსგავსი აგრომეტეოროლოგიური სადგური სამეგრელო-ზემო სვანეთის რეგიონშიც დამონტაჟდა, რაც ხელს შეუწყობს რეგიონის მოსახლეობას სოფლის მეურნეობის განვითარებისთვის.