კომერციულ ფართებზე მოთხოვნა განახევრდა, ფასი იგივე დარჩა
კომერციულ ფართებზე მოთხოვნა, წინა წლის ანალოგიურ პერიოდთან შედარებით, განახევრდა, მაგრამ ფასი იგივე დარჩა. როგორც დედაქალაქის ცენტრალურ უბნებში, ასევე პერიფერიებშიც 1 კვ/მ კომერციული ფართი 15-20 დოლარზე ნაკლებად არ ქირავდება. რაც შეეხება ბრენდებს, ცენტრალური ქუჩებიდან მათ ე. წ. "მოლებში" გადაინაცვლეს, რის გამოც გასაქირავებელი ფართების რაოდენობამაც მოიმატა. უძრავი ქონების სააგენტოებში აცხადებენ, რომ მეორეხარისხოვანი ქუჩების მიმართ ინტერესი გაზრდილია. როგორც გაზეთი "რეზონანსი" წერს, ამ ხერხს სხვადასხვა ბიზნესის წარმომადგენლები ხარჯის დაზოგვის მიზნით მიმართავენ. დილერების ინფორმაციით, დოლარის კურსის ზრდის მიუხედავად, კომერციული ფართების ფასი არ შეცვლილა. ამ ეტაპზე ფართი ყველაზე ძვირი ვაკეშია, სადაც 1 კვ/მ-ის ფასი 60-70 დოლარია, სარეალიზაციო ღირებულება კი 7-8 ათასი დოლარის ფარგლებშია.
უძრავი ქონების სააგენტო "კიბის" დირექტორის ნელი გოგუაძის შეფასებით, კომერციული ფართების გაქირავება-გაყიდვის დაბალი მაჩვენებელი სავალუტო კრიზისს უკავშირდება. მისი განცხადებით, ლარის გაუფასურებამ ამ ბიზნესს სერიოზული პრობლემა შეუქმნა, რამაც კომპანიების საქმიანობაზეც უარყოფითად იმოქმედა. "მოთხოვნა საგრძნობლად შემცირდა. ყოველი 10 კომერციული ფართიდან შეიძლება მხოლოდ 5 გაქირავდეს. მოთხოვნა, ძირითადად, კაფე-ბარებსა და სწრაფი კვების ობიექტებზეა. ბინებისგან განსხვავებით, კომერციული ფართი ლარში არ ქირავდება, ასეთი ფაქტი იშვიათად შეიძლება დაფიქსირდეს, ისიც იმ შემთხვევაში, თუ კორექტირებას კურსიდან გამომდინარე მოახდენენ. ბოლო დროს ბევრი ობიექტი გამოთავისუფლდა, მაგალითად, გამსახურდიას ქუჩაზე, მაგრამ ეს არ ნიშნავს, რომ ბიზნესი იხურება. უბრალოდ, შეიცვალა ტენდენცია და ბრენდები გადავიდნენ "მოლებში", რომლებიც დედაქალაქში ბოლო დროს გაიხსნა", - ამბობს ნელი გოგუაძე. მისი თქმით, კომერციულ ფართზე მოთხოვნა, ძირითადად, ვაკე-საბურთალოს ტერიტორიაზეა. რა შეეხება ფასს, სავალუტო რყევების მიუხედავად, ცვლილება ამ მხრივ უმნიშვნელოა. "გაქირავება უჭირთ, მაგრამ დათმობაზეც იშვიათად მიდიან. ადამიანი თუ ლოგიკურად აზროვნებს, ბაზრის რეალური მდგომარეობა უნდა გაითვალისწინოს, ასეთი კლიენტი კი იშვიათია. მაგალითად, "შანხაიზე", ბიზნესცენტრში 1 კვ/მ-ს 20 დოლარად ვაქირავებდით დღგ-ს ჩათვლით, ახლა კი 15 დოლარად ქირავდება. ყველა ინდივიდუალურად, საკუთარი საჭიროებიდან გამომდინარე, მოქმედებს. ოჯახის შემოსავლის ერთადერთ წყაროს თუ კომერციული ფართი წარმოადგენს, რეალური კლიენტის მოსაზიდად შეიძლება ფასი უმნიშვნელოდ შეამცირონ", - განმარტავს გოგუაძე.
კომპანია "ბერუკას" წარმომადგენელი ავთანდილ გუგეშაშვილი ამბობს, ბაზარზე მოთხოვნა-მიწოდების ბალანსი დაირღვა. მდგომარეობის გამოსწორება მომავალ წლამდე მოსალოდნელი არ არის. "ყველა შედარებით იაფ ფასში ცდილობს ფართის დაქირავებას. აქედან გამომდინარე, ცენტრალური ქუჩებიდან ჩიხებსა და მეორეხარისხოვან ქუჩებში გადაინაცვლეს. საცხობებსა და სწრაფი კვების ობიექტებზეა უფრო მეტად მოთხოვნა. გაქირავების მაჩვენებელი თითქმის განახევრდა, 10-დან 4-5 ობიექტის მსურველი თუ გამოჩნდება. უფრო მეტად ცენტრალურ უბნებში გვიწევს მუშაობა, სადაც ძვირად ღირებულ სეგმენტში კომერციულ ფართებზე მოთხოვნა მინიმუმამდე შეგვიმცირდა. დღესდღეობით ბაზრის პრობლემა ისაა, რომ მოთხოვნა-მიწოდების ბალანსი მნიშვნელოვნადაა დარღვეული. გასაქირავებელი ფართი ბევრია, მაგრამ კლიენტის დეფიციტი აშკარაა. უფრო მაინც საოფისე ფართებს აქირავებენ, ცოტათი კვების ობიექტები და ბარ-რესტორნებიც გააქტიურდნენ", - ამბობს გუგეშაშვილი.
დილერი სავაჭრო ცენტრების მომრავლებაზეც საუბრობს და მიიჩნევს, რომ დედაქალაქი არ არის მზად ასეთი მასშტაბური მშენებლობისთვის. მიზეზად უკვე მოქმედ სავაჭრო ცენტრებში არსებულ პრობლემას ასახელებს. "ბოლო დროს თბილისში ბევრი სავაჭრო ცენტრი აშენდა, რომელთა საჭიროებასაც მე პირადად ვერ ვხედავ. მით უმეტეს, სავაჭრო ნაგებობები შენდება ისეთ უბნებში, სადაც მათ მუშაობა რეალურად გაუჭირდებათ. მაღაზიები მეტ-ნაკლებად ახერხებენ თავის გატანას, მაგრამ სავაჭრო ცენტრებში განთავსებული საოფისე ფართების ათვისება სერიოზული პრობლემაა. ვინც უკვე შეიძინა ოფისი, ვერ აქირავებს და იძულებულია, გაყიდოს. მაგალითად, პრობლემა ჰქონდათ დადიანის ქუჩაზე მდებარე სავაჭრო ცენტრ "ქარვასლაში" განთავსებული კომერციული ობიექტების მფლობელებს. ბოლო დროს ამ სავაჭრო ცენტრიდან რამდენიმე შეკვეთა მივიღეთ. სასიკეთო ნიშანი გაჩნდება მაშინ, თუკი ლარის კურსი დასტაბილურდება ან უძრავი ქონების მფლობელები მოეგებიან გონს და ფასს დასწევენ", - აცხადებს ავთანდილ გუგეშაშვილი.
დედაქალაქის ანალოგიურად, კომერციული ფართების გაქირავება უჭირთ რეგიონებშიც. ბათუმში მდებარე უძრავი ქონების სააგენტოებში აცხადებენ, რომ ზაფხულის პერიოდთან შედარებით, შეკვეთა 60%-მდე შეუმცირდათ. წინა წლის ანალოგიურ პერიოდთან შედარებით, კლება 30-40%-ის ფარგლებშია.
"ბათუმში კომერციულ ფართებზე მოთხოვნა მეტ-ნაკლებად ზაფხულშია. წლის სხვა დრო ჩვეულებისამებრ პასიურია, ასეა წელსაც. ამ პერიოდში ქირაზე მოთხოვნამ დაახლოებით 50-60%-ით იკლო. წინა თვეში კომერციული ფართის გაყიდვის არცერთი შემთხვევა არ დაფიქსირებულა. დღეს უძრავი ქონების ბაზარზე ყველა გარიგება ხდება აშშ დოლარში. პრობლემაა ისიც, რომ ბოლო დროს ბევრი ფართი გამოთავისუფლდა, რადგან დამქირავებლები ხშირად ხელშეკრულების პირობებს ვერ ასრულებენ. იჯარა არის ძალიან მაღალი და ამიტომაც იხურება ობიექტები", - ამბობს ნონა ბარბაქაძე, უძრავი ქონების სააგენტოს წარმომადგენელი ბათუმში.მარი ჩიტაია
წყარო: გაზეთი "რეზონანსი"