აჭარის ტურიზმისა და კურორტების დეპარტამენტი რეგიონის პოპულარიზაციის მიზნით პიარ აქტივობას აგრძელებს
აჭარის ტურიზმისა და კურორტების დეპარტამენტი აჭარის რეგიონის პოპულარიზაციის მიზნით პიარ აქტივობებს განაგრძობს. აჭარის ტურიზმის დეპარტამენტის ინფრომაციით, ამჯერად საინფორმაციო ტურის ფარგლებში 10 ჟურნალისტი ბელორუსის რესპუბლიკიდანაა მოწვეული.
"ისინი რეიტინგული ბელორუსული ტელეარხებისა და ბეჭდური მედიის წარმომადგენლები არიან. ბელორუსული მედიის წარმომადგენლები სამი დღის მანძილზე გაეცნობიან რეგიონის ეკონომიკურ და ტურისტულ პოტენციალს, დაათვალიერებენ ბათუმის ღირშესანიშნაობებს, ბოტანიკურ ბაღს, გონიოს ციხესა და ქედის ღვინის სახლს. ასევე ეწვევიან ტურისტულ მეურნეობას სოფელ გობრონეთში, აჭარის სოფლად ტურიზმის გაცნობის მიზნით.
პრესტურის ფარგლებში ბელორუსი ჟურნალისტები შეხვდებიან აჭარის ავტონომიური რესპუბლიკის მთავრობის თავმჯდომარეს, არჩილ ხაბაძესა და ქალაქ ბათუმის მერს, გიორგი ერმაკოვს.
პრესტური ბელორუსის რესპუბლიკაში მიმდინარე სარეკლამო კამპანიის ფარგლებში ხორციელდება. აჭარის ტურიზმისა და კურორტების დეპარტამენტი ბოლო წლებია სარეკლამო კამპანიებსა და სხვადასხვა ტიპის აქტივობებს ბელორუსის რესპუბლიკაში აქტიურად ახორციელებს. დეპარტამენტი ყოველწლიურად მონაწილეობას იღებს მინსკში გამართულ საერთაშორისო ტურისტულ გამოფენაში Leisure, სადაც აჭარის სტენდი განსაკუთრებული ხალხმრავლობით გამოირჩევა", - აცხადებენ ტურიზმის დეპარტამენტში.
მათივე ინფორმაციით, 2015 წლის 10 თვის განმავლობაში აჭარის რეგიონში 6 101 ბელორუსი მოგზაური შემოვიდა, რაც წინა წლის ანალოგიურ პერიოდთან შედარებით 4,5%-ით მეტია.