ნოდარ ხადური აშშ-ს ხაზინის სამსახურის მრჩეველს შეხვდა
ფინანსთა მინისტრი, ნოდარ ხადური დღეს საბაჟო საკითხებში ამერიკის შეერთებული შტატების ხაზინის სამსახურის მრჩეველს, კრეგ ოლსონს შეხვდა. როგორც ფინანსთა სამინისტროში განაცხადეს, კრეგ ოლსონი ერთი წლის განმავლობაში შემოსავლების სამსახურთან საბაჟოს შესაძლებლობების გაძლიერების კუთხით აქტიურად თანამშრომლობდა. უწყების ინფორმაციით, შეხვედრაზე ფინანსთა მინისტრმა განსაკუთრებით გაუსვა ხაზი აშშ-ის ხაზინის ტექნიკური დახმარების ოფისის პოზიტიურ როლს საბაჟოს საქმიანობის გაუმჯობესების მიმართულებით და აღნიშნა, რომ ევროკავშირთან ღრმა და ყოვლისმომცველი თავისუფალი ვაჭრობის სივრცის შესახებ შეთანხმებამ ახალი და ინტენსიური რეფორმების განხორციელების საჭიროება შექმნა.
ფინანსთა მინისტრმა სტუმარს მიაწოდა ინფორმაცია იმ რეფორმების შესახებ, რომელიც ბოლო წლებში გატარდა საბაჟო მიმართულებით, მათ შორის, განხორციელდა ცვლილებები საბაჟო რისკების სტრუქტურული რეორგანიზაციის მიმართულებით, რამაც ხელი შეუწყო სამსახურებს შორის კოორდინაციის გაღრმავებას. შეხვედრაზე ასევე ისაუბრეს საბაჟო რისკების მართვის სისტემის გაძლიერებისა და საზღვარზე სხვადასხვა უწყებას შორის თანამშრომლობის მნიშვნელობაზე.
როგორც ამერიკის შეერთებული შტატების ხაზინის სამსახურის მრჩეველმა აღნიშნა, მას შესაძლებლობა ჰქონდა პირადად გაცნობოდა საბაჟო-გამშვები პუნქტების საქმიანობას და საბაჟო პროცედურებს. მისი თქმით, ქართველ კოლეგებთან წარმატებული პარტნიორობა შედგა.
შეხვედრის დასასრულს ფინანსთა მინისტრმა ამერიკის შეერთებული შტატების ხაზინის სამსახურის მრჩეველს მადლობა გადაუხადა მხარდაჭერისთვის, იმ რეკომენდაციებისთვის, რომელიც მან ქართულ მხარეს მისცა და იმედი გამოთქვა, რომ აშშ-ის ხაზინის ტექნიკური დახმარების ოფისთან ურთიერთობები მომავალში კიდევ უფრო გაღრმავდება.